Кирин 9000 (Kirin 9000s), новиот процесор од „Хуавеј“ (Huawei Technologies), поддржува безжична 5Г-мрежа, посочија од „Текинсајтс“ (TechInsights), фрлајќи малку светлина врз мистеријата околу најновите кинески уреди.
Според податоците на „Кантерпоинт“ (Counterpoint Research), во првите две недели на продажба во Кина се продадени повеќе од 300.000 уреди од серијата паметни телефони „мејт 60“ (Mate 60) што работат со Кирин 9000. Една недела пред објавувањето на најновиот „ајфон“, телефонот беше втор на кинеската продажна листа, благодарение на бранот патриотизам и еуфорија за напредниот кинески процесор.
„Хуавеј“ не прецизира некои од клучните спецификации на уредот, како што е способноста да достигне 5Г мобилна брзина. Дури и внатрешниот софтвер на телефонот не открива кои мрежни стандарди ги поддржува. Тестирањето спроведено од „Блумберг њуз“ покажа 5Г-брзина, а „Текинсајтс“ го потврди тоа по најновата анализа на расклопен уред на „Хуавеј“.
Телефоните „мејт 60“ се првите 5Г-уреди на „Хуавеј“ откако американските санкции ги погодија операциите на компанијата пред три години. Овие нови способности за 5Г покажуваат дека производителот успеал да стане независен од американските технологии во клучната област на бизнисот. Светските производители на мобилни телефони за чипови за безжична комуникација се потпираат на компании како „Скајворскс солушнс“ (Skyworks Solutions Inc.) и „Куалком“ (Qualcomm Inc).
Bloomberg Mercury
„Хуавеј“ сега открива дека четири модели на телефони го имаат микрочипот Кирин - „мејт 60“, „мејт 60 про“, „мејт 60 про+“ и „мејт X5“, кој се преклопува. Се чини дека „мејт X5“ е многу сличен на моделот „мејт X3“, кој беше претставен претходно годинава, а штотуку беше надграден со чип Кирин. Тоа сугерира дека „Хуавеј“ е уверен во својата способност да ги набави чиповите - направени од ССМ (Shanghai Semiconductor Manufacturing International Corp.) - во големи количества, вели аналитичарот на „Кантерпоинт“, Иван Лам.
„Серијата ’хуавеј мејт 60’ привлече внимание на кинескиот пазар непосредно пред лансирањето на ’ајфон 15’“, вели Лам. „'Хуавеј' е единствениот вистински конкурент на ’ајфон’, кој доминира во сегментот на кинескиот пазар со производи поскапи од 600 долари“.
.webp){kind=icon}