.webp){kind=icon}
„Гугл“ (Google) до крајот на годината ќе вработува помалку луѓе поради можноста економијата да влезе во рецесија, посочува извршниот директор Сундар Пичај во порака преку електроснка пошта доставена до вработените.
Во текот на оваа и следната година, компанијата ќе се фокусира на ангажирање инженерски и технолошки кадар, како и на пополнување на други важни позиции, се вели во соопштението во кое Bloomberg имал увид.
„Треба да покажеме претприемачки дух и да работиме побрзо и со подобар фокус. Треба да покажеме повеќе глад отколку кога времињата беа добри“, пишува во пораката на Пичај. „Во некои случаи тоа значи консолидирање на инвестициите и оптимизирање на процесите“, додава тој.
Во минатото, Google остана релативно имун на падовите во технолошкиот сектор. Компанијата ги намали вработувањата за време на последната финансиска криза, но оттогаш редовно додава нови вработени, како во одделот за маркетинг, така и во одделите за телефони, високо автоматизирани возила и апарати, кои сè уште не се профитабилни. Компанијата која е сопственик на Google, „Алфабет“ (Alphabet), на 31 март имала 164.000 вработени.
Google не е сам меѓу технолошките компании. „Снеп“ (Snap Inc.) и „Лифт“ (Lyft Inc.) соопштија дека ќе вработат помалку луѓе. Неколку недели после тоа, „Инстакарт“ (Instacart Inc.) и „Тесла“ (Tesla Inc.) рекоа дека ќе го намалат обемот на вработувања, а потоа најавија и намалување на работната сила за 10 проценти. Од истите причини „Мајкрософт“ (Microsoft) и „Мета“ (Meta) најавија намалување на работната сила и помал обем на вработувања.
Во пораката, Пичај нагласува дека Google додал 10.000 вработени во вториот квартал и дека има силни обврски да вработи неодамна дипломирани студенти во следните неколку месеци.
„Недостатокот ги прави работите појасни, тоа е нешто што го кажуваме уште од раните денови на Google. Тоа е она што го подобрува нашиот фокус и последователно води кон создавање подобри производи“, се наведува во писмото на извршниот директор.
Во претходните шест месеци вредноста на акциите на Alphabet од Ц-класа падна за 17,44 отсто. На неделно ниво, вредноста на акциите не се промени значително.
