Тиндер (Tinder) ја проширува својата програма за верификација на идентитетот во време кога вештачката интелигенција (ВИ) може да го отежни разграничувањето кои профили се вистински, додека се зголемува стапката на измами на апликациите за состаноци.
Тиндер, најпопуларната платформа за запознавање во светот, го воведува системот во САД, Велика Британија, Бразил и Мексико во текот на следните недели и месеци. Функцијата веќе се тестира во Австралија и Нов Зеланд, каде што луѓето што добиле верификација забележале зголемување од 67 отсто во совпаѓањата во споредба со оние што не го направиле тоа, се наведува во соопштението на компанијата од вторникот.
Прочитајте повеќе: Вештачката интелигенција се бори да ја заштити романсата во дигиталниот свет
Процесот бара важечка возачка дозвола или пасош и своерачно снимено видео. Трети лица го проверуваат датумот на раѓање и дали лицето на видеото се совпаѓа со фотографиите на профилот и личната карта на поединецот. Откако корисникот ќе ги достави информациите, обично потребни се една-две минути за да се одобри. Кога корисниците ќе ја завршат потврдата на личната карта и фотографиите, на нивниот профил ќе се појави сина ознака за верификација.
„Кај генерацијата зед навистина се длабоки потребата и желбата за таа автентикација“, рече главната извршна директорка на Тиндер, Феј Јосоталино. „Растењето во ’првата дигитална’ ера создава желба да се знае дали лицето што го гледаме на платформите за социјално вмрежување е всушност лицето што ќе го видиме во живо“, објаснува таа. „Клучниот фокус за нас е како да помогнеме да се донесе автентичното јас на луѓето во првите редови во нивните профили и во нивното искуство“.
Единицата на „Меч груп“ (Match Group Inc.), Тиндер го развива својот систем за верификација на лична карта со години и првпат го претстави во Јапонија во 2019 година. Компанијата постепено додава нови земји на списокот, но воведувањето алатки за идентификација е нијансирано и сложено. Неодамнешните случувања ја направија технологијата уште поитна.
Амбасадата на САД во Колумбија во јануари ги предупреди патниците дека во текот на минатата година било забележано зголемување во извештаите за криминалци што користат онлајн апликации за запознавање за да ги намамат жртвите, кои потоа ги дрогираат и ограбуваат. Тиндер ги извести своите корисници во Колумбија: „Ве молиме не заборавајте да ги проверите вашите совпаѓања, да се среќавате на јавни места и да споделувате планови со луѓе на кои им верувате. Ако нешто не е во ред, секогаш можете да го прекинете состанокот“.
Минатиот септември Австралија нареди апликациите за состаноци да развијат кодекс на однесување за да ја истакнат загриженоста околу безбедноста, откако студијата од Австралискиот институт за криминологија откри дека 72 отсто од учесниците се сретнале со апликации за запознавање што го олеснуваат сексуалното насилство.
.webp){kind=icon}
