.webp){kind=icon}
Со инвестицијата од 1,7 милијарда долари за преземање на компанијата „Ај робот“ (iRobot), „Амазон“ (Amazon.com Inc.) не го купи само производителот на роботизирани правосмукалки „румба“ (roomba). Всушност, се здоби и со компанија за мапирање. Попрецизно, со компанија која може да прави мапи од домовите на корисниците.
Компанијата објави за договорот во петокот и очекува заработка од продажбата на познатите уреди. Но, вистинската вредност лежи во способноста на овие роботи да го мапираат домот на корисниците. Како и секогаш со Amazon, сè е до податоците.
Паметниот дом, всушност не е премногу паметен. Знае само дека светилките Philips Hue и поврзаниот телевизор се во вашата дневна соба затоа што како корисник сте му дозволиле да знае. Сигурно не знае каде точно се наоѓаат уредите во таа просторија. Колку повеќе знае за даден простор, толку попрецизно може да го „режира“ начинот на кој паметнте уреди стапуваат во интеракција со вас.
Концептот на паметен дом очигледно е еден од приоритетите за Amazon. Неговите паметни звучници „Ехо“ (Echo) сè уште ги надминуваат оние од конкурентите „Епл“ (Apple) и „Гугл“ (Google), со околу 9,9 милиони продадени единици во трите месеци до март, според компанијата за анализа „Стратеџи аналитикс“ (Strategy Analytics). Тоа е надополнето со договорот од милијарда долари за производителот на куќни видео-ѕвончиња „Ринг“ (Ring) во 2018 година и за Wi-Fi компанијата „Иро“ (Eero) една година подоцна.
Но, сè уште не може лесно да се набави „Астро“ (Astro), роботот од Amazon наменет за домаќинствата кој беше промовиран со помпа минатата година, а и натаму е достапен само во ограничени количини. Тоа, исто така, барем делумно изгледаше како чекор кон мапирање на внатрешноста на домовите, задача што сега ќе припадне на iRobot. Најновите производи на оваа компанија со седиште во Бедфорд, Масачусетс, вклучуваат технологија што производителот ја нарекува „смарт мапс“ (Smart Maps), иако клиентите можат да го исклучат споделувањето на податоци.
Малку пострашно е тоа што мапите претставуваат богат извор на податоци за компаниите. Големината на вашата куќа е прилично добар индикатор за вашето богатство. Подот на кој се расфрлани играчки значи дека најверојатно имате деца. Домаќинство без многу мебел е домаќинство на кое може да му продаде повеќе мебел. Сето ова се корисни податоци за компанија каква што е Amazon, која, се занимава со продажба на секакви работи.
Аквизицијата изгледа како парченце за фирмата, која имаше 61 милијарда долари готовина на крајот на јуни. Договорот од 1,7 милијарда долари претставува премија од 22 отсто во однос на цената на акциите на iRobot пред објавувањето на договорот. Пред помалку од една година, iRobot беше проценет на 2,5 милијарди долари.
Сепак, Amazon нема да биде сам во обидете да го мапира вашиот дом. Apple, исто така, претстави алатка во јуни, наменета за следното издание на iOS, неговиот оперативен систем, која користи ласерски скенер на најновите „ајфони“ за да конструира 3Д модели наречени „RoomPlan“.
'Амазон' се шири во здравствениот сектор
Договорот за Whole Foods од 2017 година му даде увид на Amazon во индустријата за намирници. Договорот од 3,5 милијарди долари објавен за One Medical Ltd. минатиот месец обезбедува богат извор на податоци во однос на здравствената заштита. Сега iRobot може да му даде на Џеф Безос претстава за она што е во вашиот дом.
