„Адепт“ (Adept), компанија за вештачка интелигенција, кооснована од поранешен инженер во „Опен еј-ај“ (OpenAI), собра 350 милиони долари за да развие алатки што всушност можат да извршуваат команди врз основа на човечки инструкции наместо да даваат писмени одговори.
„Џенерал каталист“ (General Catalyst) и „Спарк капитал“ (Spark Capital) го водеа кругот на финансирање, кој следува по претходниот круг од 65 милиони долари на „Адепт“, реализиран на почетокот на 2022 година, се вели во соопштението што компанијата го објави денеска.
Средствата ќе ги поддржат развојот на производи на стартапот со седиште во Сан Франциско, обуката за модели и растот на бројот на вработени. „Форбс“ претходно го објави финансирањето.
„Адепт“ собира средства бидејќи заедницата за ризичен капитал сè уште закрепнува од колапсот на банката „Силикон валеј“ (СВБ) и поширокиот технолошки пад.
Акцелераторот за технолошки стартап „Ипсилон комбинатор“ (Y Combinator) вчера соопшти дека го прекинува својот стартап-фонд во доцна фаза.
Имаше многу возбуда поради ЧетГПТ (ChaGPT) на „Опен еј-ај“, кој генерира човечки одговори на едноставни инструкции, или Дал-И (Dall-E), кој создава слики. Поради тоа широк спектар на бизниси се обидоа да ја вклучат технологијата во своите производи.
Но „Адепт“ има цел да оди чекор подалеку од тоа што вештачката интелигенција дава одговори на прашања, со тоа што софтверот всушност ја извршува задачата. „Адепт“ ја замислува иднината на компјутерите како иднина каде што интерфејсите со природни јазици им помагаат на луѓето да работат поефикасно и попродуктивно, велат од компанијата. Нејзината цел е да изгради „соиграч со вештачка интелигенција“ обучен за секоја софтверска алатка. „Адепт“ гради алатки што работат „рака под рака со корисникот“ на постојни софтверски програми. Инженерите ќе можат да ги префрлат задачите на автоматизираниот соиграч и да го ослободат своето време.
„Гигантските темелни модели за јазик и слики покажаа неверојатни способности во последните неколку години. 'Адепт' се надоврзува на овој момент преку нов вид модел“, рече коосновачот и главен извршен директор Дејвид Луан.
Инаку, Луан беше директор и потпретседател за инженерство во „Опен еј-ај“ од 2017 до 2020 година, според неговиот профил на Линкедин (LinkedIn). Главниот научник и главниот службеник за технологија на „Адепт“ се поранешни истражувачи на „Гугл бреин“ (Google Brain).
.webp){kind=icon}
