Платформата на „Мета“ (Meta), Инстаграм (Instagram) официјално ја претстави апликацијата Тредс (Threads), дизајнирана како директен ривал на Твитер (Twitter) и најсериозна закана за социјалната мрежа во сопственост на Илон Маск. На новата апликација корисниците ќе можат да објавуваат текстови и врски, да одговараат или да споделуваат туѓи објави. Тредс им овозможи на корисниците да ги префрлат своите следбеници и имиња од апликацијата Инстаграм, на која се споделуваат видеа и фотографии.
„За седум часа на новата апликација Тредс се регистрирале повеќе од десет милиони корисници“, објави Марк Закерберг, основачот на „Мета“, на својот профил на Тредс. Сепак тоа е мала бројка во споредба со повеќе од 300 милиони корисници на Твитер.
„Треба да постои апликација на која ќе се споделува јавното мислење и која ќе собере милијарда и повеќе луѓе, Твитер имаше шанса, но не успеа. Се надевам дека ние ќе успееме“, се наведува во претходната објава на Закерберг на Тредс.
Инстаграм и Фејсбук се дел од платформата „Мета“ (Meta), со успешна и долга историја на копирање производи од конкурентски социјални мрежи. Функцијата Рилс (Reels) е копија на видеоапликацијата Тикток (TikTok), додека Сторис (Stories) настана по брзорастечката апликација Снепчет (Snapchat).
Bloomberg Mercury
Aпликациите на „Мета“ индиректно се натпреваруваа со Твитер, привлекувајќи го вниманието на корисниците, медиумските куќи, политичарите и други влијателни личности да го фаворизираат објавувањето на социјалните мрежи што се под оваа платформа.
Се чини дека моментот за новата апликација на „Мета“ е погоден. Откако Маск го купи Твитер за 44 милијарди долари во октомври, компанијата отпушти илјадници вработени, и ги изложи корисниците и огласувачите на серија технички предизвици.
Твитер исто така беше финансиски погоден. „Приходите од реклами во компанијата со седиште во Сан Франциско се намалени за 50 отсто“, рече Маск во март, а неодамна ја ангажира Линда Јакарино, извршна директорка на „НБС јуниверзал“ (NBCUniversal), да се обиде да ги подобри односите со брендовите.
И по лансирањето на Тредс, Твитер продолжи да ограничува колку твитови дневно можат да гледаат корисниците, мерка што Маск ја нарече „привремена“ за да се спречи кражба на податоци и ботови. Тие ограничувања се само последниот потег што ги натера корисниците на Твитер да бараат алтернативи.
Новата апликација ќе ги има истите правила за управување со содржина како Инстаграм, со исти контроли за потиснување и блокирање на вознемирувачките сметки. Засега апликација започнува без реклами, за приклучување на што е можно поголем број корисници.
.webp){kind=icon}
