PwC ќе нуди консултантски услуги од ботови со вештачка интелигенција

„Прајсвотерхаус Куперс“ (PricewaterhouseCoopers LLP / PwC) соработува со сопственикот на ЧетГПТ (ChatGPT), компанијата „Опен еј-ај“ (OpenAI), за да им понуди на своите клиенти совети генерирани од вештачка интелигенција, во ситуација кога водечките четири ревизорски фирми бараат начини да ги намалат трошоците и да ја зголемат продуктивноста.

Ревизорот ќе користи вештачка интелигенција за консултации во врска со сложени прашања за даноците, легислативите и човечките ресурси, како што се спроведување длабинска анализа на компаниите и идентификување проблеми со регулаторната усогласеност, па дури и препораки за тоа дали да се одобрат деловни трансакции.

Соработка ја прави PwC прв член на големата четворка што стана партнер на „Опен еј-ај“, фирма што се смета за една од водечките компании во технологијата за генеративна вештачка интелигенција со својот четбот ЧетГПТ.

Bloomberg

Големите ревизорски фирми ги намалуваат трошоците за да се справат со забавувањето на професионалните услуги. PwC ги замрзна зголемувањата на платите и бонусите за некои од своите 25.000 вработени во Велика Британија, „Делојт“ (Deloitte LLP) планира да укине повеќе од 800 работни места во Британија, „Ернст енд Јанг“ (Ernst & Young LLP) ќе намали околу пет проценти од својот оддел за консултации за финансиски услуги во земјата, додека КПМГ (KPMG LLP) планира да скрати 125 консултантски позиции.

Oд PwC соопштија дека партнерството со „Опен еј-ај“ што не се базира на ЧетГПТ нема да резултира со отпуштања во блиска иднина.

Новиот систем за вештачка интелигенција на PwC веќе „се однесува како партнер со 25-годишно искуство“, рече Бивек Шарма, извршен директор за даночни, правни и човечки ресурси во PwC UK, во интервју во понеделникот.

„Глобалниот товар за усогласеност расте, а со геополитиката, нивото на сложеност со кое се соочува врвниот менаџмент е какво што не сме виделе досега“, рече Шарма. „Многу луѓе зборуваат за тоа како вештачката интелигенција ќе ги замени работните места, но реалноста е дека за да се движите во овие многу сложени ситуации, вештачката интелигенција ќе биде неопходна за навистина да се заврши работата“.

„Харви“ (Harvey), стартап за вештачка интелигенција поддржан од „Опен еј-ај“, специјализиран за професионални услуги, исто така е дел од партнерството.

Системот моментално се применува во Британија, каде што на околу 650 вработени ќе им биде овозможен пристап за тестирање и обука. Фирмата планира да го прошири до 10.000 вработени во повеќе од 50 земји во следните неколку месеци. Тоа ќе им овозможи на вработените да спроведат неколку поголеми проекти во време што инаку би било потребно за еден, и тоа на подобро ниво, како што соопшти PwC. Ова партнерство овозможува и реализација на големи проекти што претходно биле премногу скапи или одземаат многу време.

„Ова е област за која сме навистина возбудени“, рече Бред Лајткап, извршен директор на „Опен еј-ај“, во интервју преку Зум (Zoom). „Овие модели можат да бидат многу моќни асистенти во правните, сметководствените и даночните процеси“, додаде тој.

Во моментов нема коментари за веста. Биди прв да коментира...

Остави коментар