ЧетГПТ отсега ќе памети детали од вашите разговори

Следниот пат кога ќе му кажете на ЧетГПТ (ChatGPT) дека сте алергични на авокадо или претпочитате сите белешки за состаноци да бидат форматирани во точки, четботот веројатно ќе може да ги запамети тие детали.

„Опен еј-ај“ (OpenAI) тестира опција за корисниците да бараат од популарниот четбот да задржи конкретни информации од една до друга сесија, наведе стартапот за вештачка интелигенција во објава во вторникот. ЧетГПТ исто така ќе може автоматски да одредува кои точки од разговорите на корисникот треба да се запомнат.

„Опен еј-ај“ првично ќе ги направи функциите достапни за стотици илјади слободни и претплатени корисници на ЧетГПТ, со планови да ги прегледа повратните информации пред да ги направи пошироко достапни, изјави компанијата за „Блумберг њуз“.

Новата функција за меморирање го означува најновиот обид на „Опен еј-ај“ да го направи својот најпознат производ покорисен - и персонализиран - за своите 100 милиони неделни корисници, бидејќи стартапот се соочува со растечка листа на ривали што нудат конкурентни четботови. Додека градењето подетална историја за секој корисник може да создаде нови грижи за приватноста, тоа е исто така ефикасен начин за интернет-компаниите да го приспособат искуството за секој човек и да ги привлечат клиентите. „Опен еј-ај“ претходно им даде на луѓето можност да обезбедат персонализирани инструкции за ЧетГПТ за корисниците да не мора да ги повторуваат своите преференции во секој разговор, но новата функција оди подалеку од тоа.

Џоан Џанг, шефица на одделот за производи на „Опен еј-ај“ што се фокусира на тоа како моделите со вештачка интелигенција реагираат на луѓето, го покажа потенцијалот на функцијата обезбедувајќи три различни факти за ЧетГПТ, по еден во секој од трите различни разговори. Џанг напиша дека има мало дете по име Лина, која наскоро ќе наполни пет години, дека Лина сака медузи и дека на Лина ѝ се допаѓа розовата боја. Во четвртиот разговор, Џанг едноставно побара од ЧетГПТ да направи роденденска честитка за нејзината ќерка. Четботот го користеше генераторот на слики Дали 3 (DALL-E 3) на „Опен еј-ај“ за да направи розова картичка со розова медуза на неа, на која пишуваше: „Среќен петти роденден, Лина“.

„Опен еј-ај“ ќе ги извести луѓето доколку добијат пристап до функцијата, велат од компанијата. Тие со оваа функција ќе можат да избришат поединечни детали што се зачувани, да ги избришат сите одеднаш или да изберат целосно да ја исклучат опцијата. Корисниците исто така може да прашаат на што точно се сеќава ЧетГПТ за да добијат преглед на сите информации што ги задржал со текот на времето.