АСМЛ (ASML Holding NV) во четвртиот квартал резервираш над двојно повеќе нарачки од очекуваното, бидејќи бумот на вештачката интелигенција (ВИ) ја зголеми побарувачката за нивните машини за производство на чипови. Холандската компанија пријави нарачки вредни 7,09 милијарди евра во четвртиот квартал, според соопштението од средата. Тоа се споредува со просечната процена на аналитичарите анкетирани од „Блумберг“ (Bloomberg), која изнесува 3,53 милијарди евра.
Резултатите доаѓаат неколку дена откако пазарната капитализација на АСМЛ падна за повеќе од 19 милијарди евра во понеделникот, поради загриженост дека најновиот модел за ВИ на „Дипсик“ (DeepSeek) може да обезбеди перформанси споредливи со западните модели, но по многу пониска цена. Инаку, АСМЛ произведува машини потребни за производство на некои од врвните чипови што се забранети за купување од кинескиот стартап.
Во обид да го спречат напредокот на Кина во областа на вештачката интелигенција, САД му забранија на својот геополитички ривал да извезува напредни полупроводнички технологии. Соодветно на тоа, АСМЛ (ASML) никогаш не можеше да ѝ ги продаде на Кина своите најнапредни машини за екстремна ултравиолетова литографија (EUV) поради ограничувањата наметнати од САД. Минатата година холандската влада исто така го блокира извозот на системи за длабока ултравиолетова литографија (DUV) во Кина, по притисокот од администрацијата на Бајден.
Сè поголем притисок од САД
Напредокот на „Дипсик“ покажува дека кинеските програмери за вештачка интелигенција нашле начин да ги заобиколат забраните и да се фокусираат на поголема ефикасност со ограничени ресурси. Нивниот најнов модел отвори прашања за ефикасноста на трговските ограничувања.
И покрај сè поголемиот број ограничувања, АСМЛ имаше корист од големата побарувачка од Кина минатата година бидејќи кинеските производители на чипови купуваа постари системи што се користат за производство на постари (помалку моќни) полупроводници.
„Американскиот притисок врз АСМЛ - дополнително да ја ограничи продажбата на полупроводнички технологии во Пекинг - веројатно ќе се зголеми под водство на претседателот Трамп“, рече холандскиот премиер Дик Шоф во интервју за „Блумберг“ (Bloomberg) на Светскиот економски форум во Давос.
АСМЛ ќе има корист од милијарди долари што компаниите ги ветија за изградба на ВИ-капацитети. „Мета“ (Meta) во петокот најави планови да ги зголеми годинава капиталните трошоци за проекти за вештачка интелигенција за околу половина, на дури 65 милијарди долари. Ова доаѓа откако „Опен еј-ај“ (OpenAI), „Софтбанк“ (SoftBank) и „Оркл“ (Oracle) најавија проект од 100 милијарди долари наречен „Старгејт“ (Stargate), за изградба на дата-центри и инфраструктура за ВИ низ САД.
Најголемиот купувач на АСМЛ, ТСМ (Taiwan Semiconductor Manufacturing Co.), месецов објави дека очекува да потроши помеѓу 38 и 42 милијарди долари за технологија и проширување на капацитетите во 2025 година, што е за 19 проценти повеќе од очекувањата на аналитичарите.
АСМЛ на берзата
За време на „бурата“ на берзата поради вештачката интелигенција во понеделникот, цената на акциите на АСМЛ падна за седум проценти, а тргувањето во вторникот заврши на почетната точка. Акцијата на АСМЛ годинава не ги радува инвеститорите, бидејќи падна за добри четири проценти.
Сепак, препораките на аналитичарите во однос на изводливоста на купувањето се оптимистички, бидејќи 72 процента од аналитичарите препорачуваат купување, а целната цена за 12 месеци е 839 евра. Во моментов акцијата котира на 646,6 евра. Прогнозите на некои експерти достигнуваат и до 1.000 евра.
.webp){kind=icon}