Вештачката интелигенција, машинското учење, автоматизацијата – сето ова се моќни алатки, но без соодветно лидерство, можат да создадат исто толку проблеми колку што и решаваат предизвици, беше една од главните пораки на конференцијата организирана од Women on Boards Adria (WOBA) и Finance Talks by EoS под наслов „Забрзана дигитална трансформација и револуцијата на вештачката интелигенција“, која вчера се одржа во Скопје.
Во рамки на конференцијата, етаблирани говорници зборуваа за имплементацијата на оваа технологија, технолошкиот развој на државата, дигитализацијата на јавните услуги и инклузивноста на дигиталните иновации.
Главната говорничка на настанот, Алина Тимофеева, глобално признат експерт за дигитална трансформација, вештачка интелигенција и сајбер безбедност во своето обраќање ја нагласи потребата од инклузивно лидерство и стратешки дејства за искористување на потенцијалот на вештачката интелигенција и дигиталната трансформација.
„Технологијата не е поврзана само со креирањето на кодови – таа постои за да ги направи луѓето помоќни“, посочи Тимофеева која сподели и сознанија за клучната улога на жените лидери во дигитализацијата и имплементацијата на вештачката интелигенција.
Таа учествуваше и во интерактивно интервју на сцената со министерот за дигитална трансформација, Стефан Андоновски, кое се однесуваше на клучните стратегии за напредување на технолошкиот развој на државата.
„Дигиталните иновации треба да бидат инклузивни и разновидни, обезбедувајќи им на граѓаните, без разлика на полот, да имаат еднаков пристап до можностите во дигиталната економија. Клучно е партнерството со бизнис лидерите, креаторите на политики и технолошките експерти за да се поттикнат иновациите и да се создаде попаметна и поинклузивна дигитална иднина“, посочи министерот.
Во однос на вештачката интелигенција Андоновски нагласи дека оваа технологија носи поефикасни, потранспарентни услуги, ориентирани кон потребите на граѓаните.
„Во Северна Македонија, активно работиме на дигитализација на јавните услуги со цел намалување на бирократијата, подобрување на пристапноста и обезбедување на глатка интеракција помеѓу граѓаните и администрацијата“.
Билјана Брејтвејт, претседателка на WOBA и извршна директорка на СП (Sustineri Partners) оцени дека земјава располага со талент и експертиза и има силна основа за успех во дигиталната иднина.
„Во WOBA сме посветени на поттикнување на родовата различност и економскиот раст преку силни партнерства со владите, бизнисите и невладините организации“, нагласи таа.
Катерина Бошевска, генерална директорка на ЕОС Матрикс за Македонија и Косово, во своето излагање истакна дека користењето на вештачка интелигенција во финансискиот сектор овозможува побрзо носење на одлуки, подобрување на корисничкото искуство и зголемување на ефикасноста.
„Нашата визија во ЕОС Матрикс Македонија е да ги искористиме технолошките иновации за создавање на одржливи финансиски решенија кои ќе им помогнат на компаниите и граѓаните да ја подобрат својата финансиска стабилност“, рече Бошевска.
Тања Михајловска Димитриевска, генерална амбасадорка на WOBA, посочи дека лидерството во технологијата се состои во тоа да се види потенцијалот таму каде што други гледаат проблем.
„Лидерите на иднината ќе бидат тие што ќе знаат да комбинираат технолошка експертиза со емотивна интелигенција, инклузивност и размислување ориентирано кон иднината“, посочи таа.
Конференцијата исто така вклучуваше подлабоки панел дискусии кои дадоа преглед на дигиталната иднина на државата и регионот.
Првиот панел, „Дигитална трансформација“, ги обедини експертите од јавниот и приватниот сектор за да дискутираат за важноста на соработката меѓу индустријата, академијата и политичарите. Панелистите, вклучувајќи го Владимир Атанасовски, декан на ФЕИТ, Нина Ангеловска, претседателка на Македонската асоцијација за е-трговија, Катерина Јанковиќ, членка на Управниот Одбор на НЛБ Банка АД Скопје и Татјана Бошевска, директорка на ХСО (HSO Global Services), споделија свои видувања за тоа како да се поттикне дигиталниот напредок и да се создаде иновативна средина.
Вториот панел, „Лидерство во технолошко опкружување“, беше фокусиран на улогата на лидерството во развиената дигитална економија и потребата од стратешка визија за поттикнување на иновациите.
Дискусијата, водена од Тања Михајловска Димитриевска, Ггенерална амбасадорка на WOBA, вклучуваше излагања од лидери како Катерина Бошевска, генерална директорка на ЕОС Груп во Македонија и Косово, Нина Неданоска, потпретседателла на Управниот Одбор во Шпаркасе Банка АД Скопје, Орце Симов, потпретседател на Сојузот на Стопански Комори на Македонија и Билјана Мишиќ, извршна директорка на „Иуте“ (Iute) Македонија. Размената на нивни мислења ја истакна важноста од родова различност во лидерството и потребата од колективен ангажман за позиционирање на државата како регионален технолошки центар.
.webp){kind=icon}
