AI Tech Summit во Скопје: Вештачката интелигенција ќе ѝ донесе 600 милијарди евра на европската економија до 2030-та

Со ова темпо на развој, вештачката интелигенција (ВИ) применета во безмалку сите сегменти на животот може да придонесе со 600 милијарди евра нова додадена вредност на економиите на ЕУ до 2030 година, беше истакнато на самитот „AI Tech“ што се одржува денеска и утре во Скопје. Предизвици остануваат регулирањето на целата оваа проблематика, со цел да не се загрози приватноста, безбедноста и здравјето на луѓето.

За етичките аспекти, но и за сè друго околу ВИ, експерти за ВИ од „Амазон“ (Amazon), „Гугл“( Google), „Енвидија“ (Nvidia), „Мајкрософт“ (Microsoft) и другите светски технолошки гиганти зборуваат на најголемиот настан од технолошка природа во Југоисточна Европа.

Повеќе од 700 присутни на конференцијата досега можеа да слушнат за тоа како, на пример, фудбалскиот клуб Ливерпул користи ВИ-решенија за унапредување на својата игра.

„Гугл дипмајнд“ (Google DeepMind) ја развил TacticalAI, алатка базирана на вештачка интелигенција што го проучува и анализира изведувањето корнери од страна на фудбалерите и потоа помага да се подобрат стратегиите на тренерите во клубот преку предвидувачки и генеративни ВИ-модели.

„Системот им овозможува на тренерите да испробаат алтернативни потези, откако ќе добијат сугестии базирани на големо количество обработени податоци. TacticAI е префериран од страна на тренерите во 90 отсто од случаите досега и резултатите се навистина импресивни“, рече Петар Величковиќ од „Гугл дипмајнд“, одделот на „Гугл“ специјализиран за развој на ВИ-решенија.

Јорис Кријгер од холандската банка „Де Волксбанк“ (De Volksbank) зборуваше за етичките дилеми и предизвици во развојот на вештачката интелигенција.

„Пред сè мора да си одговориме на следниве клучни прашања: Кои проблеми ќе ги реши ВИ? Кои проблеми нема да ги реши? Какви проблеми допрва ќе направи? Што може да биде под ризик во целата оваа приказна? И на крајот, што можеме ние да сториме околу тоа? Сите мора да ја сфатиме важноста на етичката компонента во оваа сфера. Сведоци сме на безброј примери во секојдневието каде што ВИ знае да направи големи проблеми, затоа што таа не е совршена и на крајот на краиштата се базира на она што го сознава и учи од веќе постојни податоци. Токму затоа најголемите предизвици во создавањето одговорна ВИ се од етичка, а не од техничка природа“, истакна Кријгер.

AI Tech Summit 2024

„Балансот е најтешката работа овде: како да креирате закони и прописи за регулирање на ВИ, а да не ги загрозите растот и развојот на компаниите преку нивната иновативна дејност. Јас сум задолжен во ‘Амазон’ да им го ‘преведам’ сето она што регулаторните тела на ЕУ го подготвуваат во областа на ВИ, за да се усогласиме со тие насоки, но и да предлагаме решенија што ќе донесат бенефиција на крајот и за нас како бизнис и за нашите потрошувачи, се разбира“, објасни Фирлус.

Конференцијата продолжува до денеска попладне, но и утре, а посетителите ќе имаат можност да се запознаат со најновите достигнувања во технологијата на вештачката интелигенција и нејзината апликативна примена во различни индустрии, ИТ, финансии, телекомуникации, здравство, забава, гејминг, производство и др.

Настанот е организиран од страна на чешката компанија „ТБМ груп“ (TBM Group) во соработка со едукативниот центар М6.

За повеќе информации посетете ја веб-страницата www.techsummit.ai 

 

Во моментов нема коментари за веста. Биди прв да коментира...

Остави коментар