Европската централна банка (ЕЦБ) ги намали каматните стапки по третпат годинава на состанокот во октомври, бидејќи побрзото намалување на инфлацијата ѝ овозможува да обезбеди поддршка на економијата на регионот, која се соочува со тешкотии. И додека поголемите европски економии, меѓу кои Германија најмногу, навистина имаат сериозни предизвици за обезбедување прифатлив економски раст, Македонија јава на ветрот што дува токму оттаму. Eкономскиот раст дома има ниска база и голем потенцијал, кој го гарантираат и добрите инвестициски политики на домашните компании, но и нивните стратегии за иден развој.
Новиот бизнис-модел глобално е воден од новите технологии и во услови на сериозни дигитални поместувања клучен фактор за раст е приспособувањето. Аналитичарите сметаат дека токму во ова лежи најважниот фактор за раст на економиите иако, секако, растот е условен од движењето на капиталот и неговата цена. А кој го финансира растот и колку чини тоа е можеби клучното прашање во овој контекст. Каматите се високи и покрај тоа што почна процесот на олабавување на монетарната политика од страна на централните банки. Тој процес започна и во Македонија и во следниот период треба да бидеме сведоци на зголемување на кредитниот раст и намалување на цената на финансирањето.
Колку во сето тоа е клучна геополитиката, дали има модел што гарантира успешен раст и како во вакви услови да се обезбедат финансии се клучните теми во фокусот на првата годишна конференција „Back to business: Економски потенцијал и развојни можности на Македонија“ на „Блумберг Адрија“.
Конференцијата свечено ќе ја отворат Христијан Мицкоски, премиер на Република Северна Македонија, и директорката за содржина на „Блумберг Адрија“, Јелисавета Лазаревиќ.
Еден од главните моменти на конференцијата ќе биде анализата „Отклучување на растот: економија и пазарот на капитал во Северна Македонија“, која ќе ја презентира Михаел Блажековиќ, аналитичар на „Блумберг Адрија“. Во анализата се разгледува состојбата на домашната економија и пазарот на капитал, но ќе бидат идентификувани и клучните потенцијали за натамошен раст и развој на земјата.
Блумберг Адрија
Кои се актуелните контексти за водење бизнис во земјава во услови на глобален притисок и во време кога трансформацијата го носи бизнисот до височини што гарантираат новина, но и стабилност во глобалните промени - на овие теми ќе се дебатира на првата панел-дискусија „Македонскиот реален сектор: Бизнис-модел воден од новите технологии“. Душан Митрев, генерален директор на „Пивара Скопје“, кој е еден од говорниците, ќе ги сподели своите искуства за тоа како оваа компанија ги користела технолошките иновации за зголемување на конкурентноста на пазарот. Живко Мукаетов, претседател на Управниот одбор на „Алкалоид“, ќе даде свој осврт на стратегиите на неговата компанија во контекст на приспособувањето на променливиот пазар. Од друга страна, за улогата на телекомуникациската индустрија во економскиот раст ќе зборува и Методија Мирчев, главен извршен директор на „А1 Македонија“, додека Марија Дуковска-Павловска, генерална директора на „Макстил“, ќе истакне како новите технологии се интегрирале во челичната индустрија.
Комерцијалните банки ќе бидат принудени на нови потези во услови на поинаков монетарен и регулаторен амбиент. А сега, кога се случува пресврт во монетарната политика, повторно се поставува прашањето за поинтензивно кредитирање на стопанството. Но потребни ли се и други промени во финансискиот систем во земјата, дали окрупнувањето на банкарскиот сектор е решение? Сите аспекти ќе бидат дискутирани на втората панел-дискусија: „Пристап до пари во услови на глобални промени, кој го финансира растот?“
Министерката за финансии Гордана Димитриеска-Кочоска ќе го изнесе своето видување за предизвиците што финансискиот сектор во земјата мора да ги надмине за да го поддржи економскиот раст.
Тони Стојановски, претседател на Управниот одбор на „НЛБ банка“ АД Скопје, ќе се осврне на можностите за домашните компании, но и на работата на банкарскиот сектор во време кога централните банки почнуваат да ја олабавуваат монетарната политика, а цените на финансирањето сè уште се високи. Марија Томеска, претседателка на Управниот одбор на „Еуролинк осигурување“, меѓу другото ќе зборува за тоа каква е улогата на осигурувањето и дали тоа може да помогне во создавањето подобри услови за компаниите. Мирослав Марчев, управен партнер за Северна Македонија во ПвЦ (PwC), ќе даде поширока слика за тоа како меѓународните финансиски институции се приспособуваат на глобалните промени и што значи тоа за домашните претприемачи, но и за тоа во кој финансиски сектор постои интерес од инвеститорите за стекнување постоен бизнис или за основање нов?
Конференцијата се одржува со помош на водечките компании од земјава, меѓу кои „НЛБ банка“ АД Скопје, „А1 Македонија“, „Макстил“, „Еуролинк осигурување“, ПвЦ и „Божиновски часовници и накит“. Сите заинтересирани за конференцијата „Back to business:Економски потенцијал и развојни можности за Македонија“ можат да се пријават бесплатно на линкот.
.webp){kind=icon}
