Игрите за мобилни телефони се доминантна сила во светската индустрија на игри. Според податоците од „Њузу“ (Newzoo), oваа гранка во 2021 година оствари приходи во висина од 93,2 милијарди долари, а веднаш зад неа следува секторот на игри со конзоли, чиј приход во истата година изнесуваше 50,4 милијарди долари. Трет на списокот е секторот на компјутерски игри, со остварен приход од 36,7 милијарди долари.
Постојат три најчести и заеднички начини за монетизација во гејминг-индустријата: купување во самата апликација, рекламирање и еднократна наплата.
Според аналитичарите на „Блумберг Адрија“, во денешно време најраспространет модел на монетизација е комбинацијата од купување во рамки на апликацијата (т.н. микротрансакции) и рекламирање. Но, во секој случај, микротрансакциите се водечкиот начин за остварување приходи и се користат од 70-80 отсто од игрите.
Главни предизвици
И покрај високоталентираната инженерска работна сила во регионот Адрија, се забележува недостиг од искусни програмери на игри, сметаат аналитичарите на „Блумберг Адрија“. И токму поради тоа, според нив, кај локалните компании понекогаш се јавува потреба да платат искусни професионалци од западните земји, а тоа често значи и висока цена на трудот.
Пречка за оваа индустрија во регионот е и двојното оданочување, имајќи предвид дека не постојат договори за избегнување на двојното оданочување меѓу САД и Македонија, Србија и Босна и Херцеговина, алармираат нашите аналитичари.
Главните платформи на кои се пласираат и дистрибуираат игрите за мобилни телефони се „Плеј стор“ (Play Store) на „Гугл“ и „Еп стор“ (App Store) на „Епл“, каде што секоја трансакција се оданочува до 30 отсто провизија, пишува во извештајот на нашите аналитичари.
Преземања
Светската индустрија за игри во последните години минува низ енергична консолидација, а глобализацијата ги интегрираше и компаниите од нашиот регион, забележуваат аналитичарите на „Блумберг Адрија“ и посочуваат на неколку примери на преземања на компании од регионот, кои во детали се претставени во анализата прикачена во ПДФ во рамките на овој текст.
Финансиски перформанси
Кога станува збор за финансии, овдешните компании покажаа позитивен тренд, следејќи ги фирмите од Запад. Локалните компании остварија просечен раст на продажбата од 41 отсто во 2020 година. Растот најмногу е придвижен од владините политики, чија цел е да се задржат граѓаните во татковината, велат аналитичарите на „Блумберг Адрија“.
Од пандемијата најмногу профитираше компанијата „Нанобит“, остварувајќи трицифрен раст на продажбата, од 102,5 проценти. Сепак, растот на трошоците на услугите од 96 проценти и зголемувањето на трошоците за вработените од 32 отсто ги намалија маржите ЕБИТ и ЕБИТДА, потенцира аналитичкиот тим. Тие маржи продолжија да паѓаат и во текот на 2021 година, првенствено водени од падот на продажбата за 24,4 проценти.
„Екипа2“ е единствената компанија што успеа да оствари раст на продажбата во сите три анализирани периоди, одржувајќи ги стабилни маржата на профитабилноста, големите приноси на капиталот и вложениот капитал.
Структурата на трошоците е таква што трошоците за вработените обично претставуваат најголем дел. На пример, во „Нордеус“ 86 отсто од трошоците отпаѓаат на вработените, додека во „Екипа2“ тој процент е 74.
Македонската фирма „Фјуриос авокадо“ меѓу добрите примери
Играта на македонската компанија „Фјуриос авокадо“ достигна светска популарност по објавувањето во 2020 година и сега има над 150 милиони преземања. Одреден период таа беше игра број еден во светот според бројот на преземања. Компанијата, која се состои од околу осум вработени, во 2021 година успеа да ја монетизира базата на корисници, што резултира со 2,3 милиони евра и импресивна маржа ЕБИТ од 89 проценти, потенцира аналитичкиот тим на „Блумберг Адрија“.
Монетизација во регионот Адрија
Локалните параметри на игрите се базираат првенствено на т.н. фримиум-модели, што значи дека пласираат бесплатни игри, кои подоцна ги монетизираат преку базата на корисници преку купување во рамките на самите игри, исто како и преку реклами.
Едно од прашањата со кои се соочуваат овие програмери е како да продадат содржини во игрите, а притоа да не ги демотивираат постојните корисници што не сакаат да купуваат, но се исто важни поради природата на бизнисот со рекламирање, велат аналитичарите на „Блумберг Адрија“.
Очекувања
Трендот оди во корист на индустријата на игри, бидејќи младите генерации поминуваат повеќе време играјќи игри наместо за традиционалните видови забава, како што се гледање телевизија или читање книги. Ваквиот тип забава стана омилена и за генерацијата зед (Z) и за милениумците, велат нашите аналитичари.
Демографската слика на играчите на мобилни телефони постојано се менува и укажува на одлично сценарио во гејминг-индустријата, која ги примамува сѐ повеќе возрасните и женската популација, резултирајќи со поголем потенцијален пазар, смета нашиот аналитички тим.
Според податоците од „Мопаб“ (MoPub), просечната старост на играчите на игри за мобилен телефон е 36 години, а над половината од нив се постари од 34 години, оценува „Мидеакикс“ (Mediakix).
Одредени макроекономски ветришта, како што се растечките каматни стапки и високата инфлација, негативно ќе влијаат и на гејминг-индустријата, но на краток рок, заклучуваат аналитичарите на „Блумберг Адрија“.
Во моментов нема коментари за веста. Биди прв да коментира...