text size
Македонија е лидер не само во регионот, туку и во Европа по бројот на пушачи. Близу половина од населението пуши што е предуслов пазарот да биде атрактивен и за производителите и за дистрибутерите на цигари.
И додека глобално, бројот на пушачи се намалува, кај нас евтините цигари и отсуството на казни за непочитување на забараните за пушење во затворени простории придонесуваат процентот постојано да се зголемува.
Од земјите во регионот Адрија, само Србија може да се мери со земјава по стапката на пушачи, се наведува во најновиот извештај на аналитичкиот тим на „Блумберг Адрија“ во кој се вели дека заради се уште големиот број на луѓе кои се зависни од никотинот, тутунските компании и во следните година до две ќе бележат средно високи стапки на раст.
Целата анализа можете да ја преземете ТУКА.
„Затоа, можеме да заклучиме дека регионот, особено во подрачјето на Македонија и Србија, е поатрактивен на страната на потрошувачката поради високата стапка на пушачи, достапните цигари и (во повеќето случаи) лошите мерки за забрана на пушењето“, велат од нашиот аналитички тим.
Дистрибутерите работат подобро од производителите на цигари
Аналитичкиот тим го анализираше работењето и на производителите и на дистрибутерите во тутунскиот сектор. Анализата покажува дека регионалната тутунска индустрија покажала жилавост во претходниот период. Аналитичарите укажуваат дека растот е намален само во 2020 година поради пандемијата предизвикана од коронавирусот, бидејќи граѓаните имаа ограничено движење и имаа помалку можности да пушат надвор од домот. Покрај оваа причина, падот во индустријата се должи и на општата неизвесност на пазарот.
Тутунската индустрија во регионот е доста профитабилна со просечна ЕБИТДА (EBITDA) маржа во 2021 година од 22 проценти. Она што негативно влијае на профитабилноста на оваа индустрија се зголемувањето на влезните трошоци како што се трошоците за енергија, зголемувањето на цените на сировиот тутун и даноците.
Аналитичкиот тим на „Блумберг Адрија“ ги истражуваше ефектите на најголемите регионални играчи во оваа индустрија и нивниот заклучок е дека регионалните дистрибутери на тутун поминале подобро од тутунопроизводителите кога станува збор за растот на продажбата во 2021 година.
Сепак, аналитичкиот тим објаснува дека за дистрибутерите, профитабилноста е остварлива само при големи продадени количини така што пониските просечни маржи во споредба со маржите на производителите не се изненадувачки.
Нашите аналитичари ги идентификуваат двата главни двигатели на тутунската индустрија:
1. Иновации во производството за следење на промените во преференциите на потрошувачите и исполнување на регулаторните барања;
2. Играчите во тутунската индустрија се вешти да ја зголемат ефикасноста на производството и да ги намалат трошоците. Било да е тоа преку намалување на работната сила, подобрување на производните процеси или отстранување на застарени производи од асортиманот заради производите за кои побарувачката расте.
Од друга страна, ги набројуваат најголемите ризици за секторот:
1. Се поголемата свесност за здравјето;
2. Заострувањето на прописите и зголемување на оданочувањето;
3. Заканите за правни постапки.
Глобално, потрошувачката на цигари постојано се намалува
На глобално ниво, тутунската индустрија се приближува до вредноста од трилион долари. Се очекува и глобалната индустрија да расте со ниска едноцифрена годишна стапка во наредниот период.
Аналитичкиот тим на „Блумберг Адрија“ посочува дека потрошувачката и производството на цигари во последните десет години постојано опаѓаат (околу еден процент годишно), а зголемувањето на вредноста на тутунската индустрија главно се должи на постојаното зголемување на цените.
Сепак, нашиот аналитички тим укажува и дека тутунската индустрија се прилагодува на новите потреби на потрошувачите, а забележителен е растот и кај алтернативните тутунски производи, како што се електронските цигари.
„Иако цигарите сè уште се примарен производ на тутунската индустрија, тие почнуваат да го губат уделот на пазарот поради алтернативните тутунски производи. Имено, цигарите забележаа негативен раст во 2020 година во однос на 2019 година, додека електронските цигари покажаа значителни стапки на раст на продажбата“, наведуваат нашите аналитичари. .
Прогнози за тутунската индустрија
Аналитичкиот тим презентира и неколку перспективи за тутунската индустрија:
Континуираниот законодавен притисок е една од главните пречки за растот на индустријата, а тоа неизбежно ќе се прелее во регионот Адрија, кој сè уште одржува лабава политика за забрана на пушењето;
Пазарите во развој ќе продолжат да ја стимулираат побарувачката;
Се очекува алтернативните тутунски производи да добијат уште поголем фокус во палетата на производи на тутунопроизводителите;
Се очекува континуирано и зголемено инвестирање во алтернативни производи.
