ББА коментар: Каква иднина ги очекува компаниите од соларната индустрија?

Цената на акциите на соларните компании во последната година падна за 25 отсто. Трамп не го сака особено ЕСГ, Кина има проблеми со секторот на недвижности, додека Европа ги вложува сите свои напори во инвестиции поврзани со одбранбениот сектор. Во основа, пазарот на соларна енергија покажува знаци на стабилизација и потенцијал за раст на маржите и покрај тековното оптоварување со задолженоста и со нискиот оперативен профит.

Компаниите членки на индексот SUNIDX моментално се тргуваат со пониска пазарна премија во споредба со глобалниот берзански индекс MSCI, при што соодносот цена/заработка (P/E) кај нив се движи околу 13,8, додека глобалниот индекс достигнува вредност од 20,7.

Падот на вредноста на соларните акции во текот на 2024 година беше проследен со пад на просечната цена на модулите за околу 15 проценти, пред се поради вишокот залихи и забавувањето на побарувачката, најмногу во резиденцијалниот сектор. Поради падот на профитабилноста, соодносот ЕВ/ЕБИТДА се зголеми на 23,13, а нето долгот кон ЕБИТДА речиси двојно се зголеми.

Политичките тензии и потенцијалните царини би можеле негативно да влијаат на цената на клучните суровини што се користат во производството на соларни панели. Ова може да доведе до дополнително слабеење на оперативните маржи, кои паднаа на -2,1 проценти во 2024 година. Влошувањето на односите меѓу САД и Кина, најголемиот производител на полисиликон, може да доведе до остар скок на цената на оваа суровина. Сепак, цената на полисиликонот веќе падна за речиси 90 проценти од рекордните нивоа во 2022 година, а поради зголеменото производство, не се очекува трајно зголемување на цената на оваа клучна компонента на соларните панели.

Регулаторните рамки кои беа фокусирани на поддршка на зелената транзиција во одредени региони покажуваат тенденција на омекнување, со ревидирање на субвенциите и владините програми за обновлива енергија. Потенцијалното укинување на субвенциите би го намалило профитот на компаниите кои се потпираат на програми како што се даночните кредити од секцијата 45X во САД.

Сепак, очекуваме подобрување на условите во наредниот период. Во 2025 година е забележан тренд на стабилизација на цените на соларните модули, најмногу поради постабилната светска побарувачка за соларна енергија. Побарувачката е поддржана од новите трендови како што е развојот на мрежите на центрите за податоци, а делумно и со падот на цените на модулите. Во области како Европа, исто така, има потреба од инсталирање на поголеми капацитети за поголема енергетска независност. Во текот на 2025 година се очекува зголемување до 30 проценти на вкупниот инсталиран капацитет, но со дополнително забавување на растот во резиденцијалниот сектор. Исто така, долгорочно, цената на електричната енергија произведена од соларни извори постојано паѓа, што ја прави поконкурентна во споредба со традиционалните извори дури и без субвенции, создавајќи силна мотивација за инвестирање во соларни системи.

Гледано во целина, соларниот пазар покажува знаци на стабилизација и потенцијал за подобрување на профитабилноста во наредниот период. Очекуваме соларната индустрија да ги претвори своите сегашни негативни приноси (ROE) и ниските оперативни маржи во одржлива профитабилност, доколку цените на суровините останат стабилни, а каматните стапки продолжат да се намалуваат.