.webp){kind=icon}
Норвешкиoт државен фонд, вреден 1,2 илјада милијарди долари, изграден од нејзиното нафтено богатство, е непозната црна кутија за многумина од 5,4 милиони граѓани на таа земја. Меѓутоа, извршниот директор Николај Танген има намера да го промени тоа.
Зголемената инфлација, турбулентните финансиски пазари и геополитичката несигурност влијаат на приносите на најголемиот светски фонд за „црни денови“. Извршниот директор започна ревизија на комуникациите и односите со јавноста, за да се осигури дека граѓаните што колективно го поседуваат фондот разбираат зошто.
„Се наоѓаме во навистина нестабилни времиња, каде што има голем ризик и може да има потенцијален пад на вредноста на фондот“, рече Танген во интервју дадено во седиштето на фондот во Осло. „Затоа е особено важно сопствениците да знаат што се случува“, додава тој.
Неговата „комуникациска атака“ вклучува поткаст со извршни директори од целиот свет, посети на училишта и ставање на персоналот од фондот во центарот на вниманието, овозможувајќи им да објаснат што прават. Посочувајќи на тоа како здравствените власти на Норвешка се справија со пандемијата, кои се покажаа подобро од повеќето колеги во другите развиени земји, Танген рече дека начинот за градење доверба е луѓето директно да слушаат специјалисти што ќе објаснат што се случува.
Николај Танген, кој две години управува со државниот фонд на Норвешка, донесе големи промени / Bloomberg Mercury
„Значително го отворивме фондот“, вели Танген. „Порано имаше четворица што можеа да зборуваат во име на фондот, сега се 575“.
„Колку повеќе луѓето знаат за фондот, толку повеќе имаат доверба во начинот на кој се управува“, велат од „Норгес банк инвестмент менаџмент“ (Norges Bank Investment Management), како што формално се нарекува фондот, повикувајќи се на истражување спроведено минатата година.
Нафтениот фонд е еден од највидливите извозни производи на Норвешка и има акции во околу 9.000 компании во над 70 земји. Во фондот минатата година се одржале повеќе од 3.000 средби и се гласало за околу 120.000 точки на генералните состаноци, со цел да се охрабрат компаниите да ги исполнат климатските и хуманитарните цели. Сега, пред да дојде време за гласање, фондот објавува како има намера да гласа, практика усвоена откако Танген станал извршен директор.
„Во суштина чувствуваме дека немаме тајни“, посочува Танген (56), кој раководи со фондот две години.
Фондот загуби 174 милијарди долари, или 14,4 отсто, во првата половина на 2022 година, што е негова најголема загуба во валути во последната половина година, и дополнителни 43 милијарди долари во третиот квартал. Танген и неговиот тим се фокусирале на дефанзивно позиционирање во почетокот на 2021 година, за да ги надминат ефектите од побрзата инфлација, потег со кој фондот го надмина реперот осум квартали по ред.
Покрај зголемувањето на видливоста, планот на Танген има цел да привлече нови таленти и да ги подобри перформансите. Промената е веќе видлива: апликациите за постдипломски програми и стажирање годинава скокнале за 65 проценти односно 37 проценти, соодветно, во споредба со една година претходно.
Како дел од својот поткаст, Танген, меѓу другите гости, го интервјуираше и извршниот директор на Голдман Сакс, Дејвид Соломон / Bloomberg Mercury
Во март, фондот ја објави првата епизода од својот поткаст, „Во добро друштво“ (In Good Company). Во емисијата, Танген интервјуира врвни директори на компании вклучени во портфолиото на фондот, како Дејвид Соломон од Голдман Сакс (Goldman Sachs) и Хелена Хелмерсон од модниот гигант H&M, за да ги запознае своите сонародници со светските лидери за кои верува дека никогаш не би ги виделе поинаку. За поткастот има голем интерес, особено кај младите.
Танген во разговорите сака да отвора теми како што се корпоративната култура, лидерството и „психолошката безбедност“ и со ведар и отворен тон ги прашува директорите за тешки теми.
