„Комерцијална банка“ почнува длабинска анализа на „Стопанска банка Битола“

„Комерцијална банка“ АД Скопје ќе почне длабинска анализа за работењето на „Стопанска банка“ АД Битола. Од „Комерцијална банка“ денеска соопштија дека Надзорниот одбор вчера донел таква одлука. Анализата, како што се тврди, е за да се дефинира намера за присоединување на „Стопанска банка“ АД Битола кон „Комерцијална банка“ АД Скопје.

„По завршување на постапката на длабинска анализа, „Комерцијална банка“ АД Скопје ќе донесе одлука дали да продолжи постапката со изразување намера за склучување на трансакцијата на присоединување, за што јавноста ќе биде известена.

Како што веќе пишуваше „Блумберг Адрија“, оваа длабинска анализа беше еден од приоритетите на „Комерцијална банка“, операција што беше наведена и во развојниот план на банката за периодот 2024-2026 година. 

Во тој развоен план инаку пишуваше и дека банката има намера да привлече стратегиски инвеститор од странство.

„Доколку акционерите на ’Комерцијална банка’ АД Скопје обезбедат контролен пакет на акции и утврдат соодветни параметри, менаџментот на банката ќе презема соодветни постапки, мерки и активности за евентуално привлекување потенцијален странски стратегиски инвеститор“, пишува во развојниот план на банката.

Во него се дефинираат и условите што би требало да ги исполнува потенцијалниот странски инвеститор. Меѓу нив се наведува дека инвеститорот треба да е банка чие име е реномиран меѓународен бренд, понудата да ја одразува реалната вредност на акциите на „Комерцијална банка“ и да достави стратегиски план за идниот развој на банката.

Првично, информацијата за преземање беше објавена во септември лани. „Стопанска банка Битола“ и во 2023 година оствари загуба, а „Комерцијална банка“ АД Скопје ја заврши 2023 година уривајќи неколку рекорди. Банката објави дека планира да одвои околу две милијарди денари (33,7 милиони евра) за исплата на дивиденди односно бруто-износ од 910 денари (14,7 евра) по акција, што е рекорден износ, значително поголем отколку во претходните две години. Банката исплати 500 денари дивиденда по акција во 2022 година и 620 денари во 2021 година. Високата дивиденда следуваше по објавата на финансиските резултати на банката за 2023 година, кои покажаа рекордна заработка од 3,5 милијарди денари (58,2 милиони евра), што е за 66,6 проценти повеќе во однос на претходната година. 

Во првите три месеци годинава банката оствари добивка од 1,17 милијарда денари (19,1 милиони евра), што е зголемување за 13,4 проценти во однос на истиот период во минатата година, кога добивката на банката изнесувала 1,03 милијарда денари (16,9 милиони евра). 

Во моментов нема коментари за веста. Биди прв да коментира...

Остави коментар