Зошто „Комерцијална банка“ не успеа да ја преземе „Стопанска банка Битола“?

На 26 август „Комерцијална банка“ објави понуда за преземање на 100 проценти од акциите на „Стопанска банка Битола“, но за да биде успешна понудата беа потребни минимум 67 проценти плус една акција. Не е изненадување што откупот не успеа до дадениот рок (22 септември), бидејќи 67 проценти од акциите е релативно висок праг, а за тоа се согласија само акционерите што поседуваат 45 проценти од акциите.

На прв поглед, понудата за преземање од „Комерцијална банка“ не беше премногу мотивирачка за акционерите, бидејќи цената од 3.200 денари за акција за „Стопанска банка Битола“ всушност беше цената со која се тргуваше на берзата во тој период. Цената на акциите на „Стопанска банка Битола“ се зголеми за цели 33 проценти од почетокот на годината, под влијание на очекуваната понуда за преземање, но имаше основа и во подобрените финансиски резултати. Откако беше објавено дека нема да има откуп на акции, цената остана на 3.200 денари и во текот на следните трговски сесии, иако со скромни обеми. Во услови на ниска ликвидност не се очекува брза реакција на пазарот.

Заработката по акција (EPS) само за првото полугодие од 2024 година изнесува 130 денари, додека финансискиот резултат во првото полугодие од 2023 година е негативен (EPS -137 МКД) и под влијание на високи загуби поради оштетување на финансиските средства. Иако финансискиот резултат е подобар, структурата на билансот беше променета во текот на првата половина на 2024 година. Депозитите продолжија да растат во однос на крајот на 2023 година (+ 647 милиони денари), така што банката имаше добар кредитен потенцијал, кој не успеа да го претвори во подобра кредитна активност (кредитите беа намалени за 829 милиони денари), туку следуваше акумулација на готовина (+ 1.897 милиони МКД). Ефектот врз билансот на успех можеби не е видлив во моментов, бидејќи готовината може да се пласира и со солидни каматни стапки, но контракцијата на кредитното портфолио не е добар знак во однос на идното деловно работење, бидејќи кредитите, долгорочните каматни пласмани се намалени.

И тоа во услови на растечка кредитна активност на целиот пазар - вкупните кредити се зголемени за околу четири проценти до јуни 2024 година во однос на декември 2023 година.

Со преземањето на „Стопанска банка Битола“, „Комерцијална банка“ ќе ја зацврстеше својата позиција на пазарот побрзо отколку што е можно преку органски раст и на ефикасен начин. Цената спрема книговодствената вредност (PB ratio) е под 1 (околу 0,7, за цена на акција од 3.200 денари) и по вредносните корекции во 2023 година, кои го подобрија квалитетот на портфолиото, што укажува на потценување на цената на акцијата. Особено што ова е еден од пониските соодноси цена/книговодствена вредност во банкарскиот сектор на Македонија, но е во опсегот на оние во регионот. За споредба, понудата за „Стопанска банка Битола“ дејствува примамливо ако се потсетиме дека „НЛБ банка“ понуди околу 47 проценти од книговодствената вредност за купување на „Адико банка“ (сооднос цена/книговодствена вредност од 0,47 во моментот на понудата). И таа понуда имаше слаб одзив, иако понудената цена дополнително беше зголемена за 10 проценти до истекот на рокот.

Но интересно реагираа сопствениците на акциите на „Стопанска банка Битола“. Сопствениците на околу 45 проценти од акциите ја прифатија понудата, па гледаме дека цената од 3.200 денари беше прифатлива за дел од акционерите, додека преостанатите очигледно гледаат подобри изгледи во иднина.

 

Во моментов нема коментари за веста. Биди прв да коментира...

Остави коментар