По неуспешното преземање, промени во Надзорниот одбор на „Стопанска банка Битола“

„Стопанска банка Битола“ извести преку Македонската берза за промени во органите на управување. Имено, според објавата за член на Надзорниот одбор на банката е избран Игор Камбовски. Народната банка издала и Решение за издавање претходна согласност со кое за член на Надзорниот одбор е назначен Стевчо Јолакоски.

Јолакоски и досега, а од 2017 година беше член на Надзорниот одбор на оваа банка. Во актуелниот состав на одборот покрај него се и Гордана Гацева, Борислав Атанасовски и Антони Пешев.

„Стопанска банка Битола“ беше тргната од листата на набљудување на Македонска берза, а откако стана јасно дека е неуспешна понудата од „Комерцијална банка“ за преземање на мнозински пакет акции од „Стопанска банка Битола“.

Овој исход беше обелоденет минатата недела кога „Комерцијална банка“ АД Скопје соопшти дека понудата за преземање на „Стопанска банка“ АД Битола ја прифатиле 149 сопственици на обични акции со право на глас, кои поседуваат вкупно 176.154 обични акции, односно 45,05 проценти од сите акции со право на глас издадени од „Стопанска банка“ АД Битола. Понудата за преземање се однесуваше на сите 390.977 обични акции со право на глас издадени од „Стопанска банка“ АД Битола.