Ќе остане ли Македонија само со две домашни банки?

На почетокот на неделава почна да тече рокот во кој акционерите на „Стопанска банка Битола“ треба да се изјаснат за понудата за преземање од страна на „Комерцијална банка“, која предвидува откуп на сите акции од битолската банка по цена од 3.200 денари за акција. Рокот за прифаќање на понудата истекува на 22.9.2024 година, а таа ќе се смета за успешна доколку бидат преземени 261.956 акции, што претставува 67 проценти плус една акција од 390.977 обични акции, колку што се издадени од „Стопанска банка Битола“. Од исходот на овој обид за преземање ќе зависи и дали новото прегрупирање ќе го намали бројот на банки во Македонија што се во приватна сопственост на домашни акционери.

Акционери од Грција, Австрија, Бугарија...

Имено, моментално во Македонија работат вкупно тринаесет банки, од кои девет банки се во претежна странска сопственост, а пет од нив се подружници на странски банки. Ако се изземе Развојната банка на Северна Македонија, која е во државна сопственост, во земјава сега има само три банки што се во претежна сопственост на домашни акционери - „Комерцијална банка“, „Стопанска банка Битола“ и „ТТК банка“. Преостанатите девет банки се во претежна сопственост на акционери од странство, и тоа од Австрија, Бугарија, Грција, Словенија, Турција, Германија и Швајцарија.

Учеството на странските банки во вкупните кредити надминува 80 проценти

Според податоците на Народната банка, банките во претежна странска сопственост преовладуваат во структурата на поважните позиции од билансите на банкарскиот систем и во првиот квартал од 2024 година. Кварталната промена на учествата на банките во странска сопственост по позиции беше претежно надолна, иако мала. Најголемо намалување на учеството на овие банки, од 0,4 процентни поени, се забележува во вкупниот капитал и резервите, а извесен пад на нивните учества се забележува и во вкупната актива (0,3 процентни поени), кредитите на нефинансискиот сектор (0,3 процентни поени) и вкупните приходи (0,2 процентни поена).

„Наспроти тоа, учеството на странските банки во вкупниот финансиски резултат се зголеми за 0,3 процентни поени. И натаму овие банки имаат највисоко учество во вкупните кредити на нефинансискиот сектор (82,8 проценти)“, наведуваат од Народната банка во последниот извештај за ризиците во банкарскиот систем.