КХВ дозволи „Комерцијална банка“ да даде понуда за „Стопанска банка Битола“

Комисијата за хартии од вредност (КХВ) денеска на седница донесе решение со кое на „Комерцијална банка“ ѝ издаде дозвола за давање понуда за преземање на „Стопанска банка Битола“.  

Понудата за преземање се однесува на 390.977 обични акции со право на глас издадени од „Стопанска банка Битола“, кои претставуваат 100 проценти од основната главнина на банката. Преземањето на хартиите од вредност ќе се врши по цена од 3.200 денари по акција.

„Во согласност со понудата за преземање, а според Законот за преземање  акционерски друштва, преземачот утврдил најмало количество на обични акции на кои се однесува понудата за преземање што треба да биде прифатена за понудата да се смета за успешна, односно понудата ќе се смета за успешна доколку биде прифатена од акционери што поседуваат најмалку 261.956 обични акции кои претставуваат 67 проценти плус една акција од вкупниот број обични акции со право на глас издадени од ’Стопанска банка’ АД Битола. Рокот за прифаќање на понудата за преземање започнува да тече од денот на првото објавување на понудата за преземање и изнесува 28 календарски дена“, информира КХВ.

„Комерцијална банка“ на 13-ти месецов објави дека нуди 3.200 денари по акција за преземање на „Стопанска банка Битола“, откако претходно од Народната банка ѝ била издадена согласност за стекнување капитален дел од 100 проценти од вкупниот број обични акции со право на глас издадени од „Стопанска банка Битола“. 

Претходно, „Стопанска банка Битола“ сподели дека Управниот одбор на 1 август во согласност со членот 22 став 1 од Законот за преземање акционерски друштва добил известување од „Комерцијална банка“ дека има намера да даде понуда за преземање на сите обични акции со право на глас издадени од „Стопанска банка Битола“.