Кој може да има пресуден збор за понудата за преземање на „Стопанска банка Битола“?

„Комерцијална банка“ во име на српската „Алта банка“ вчера ја објави понудата за преземање на „Стопанска банка“ АД Битола според која се нуди преземање на сите 371.528 акции oсвен 19.439 акции што се веќе во сопственост на српската банка и поврзаните лица. „Алта банка“ се обврзува да ги преземе сите акции по цена од 3.777 денари за акција и за таа цел веќе уплатила 1,4 милијарда денари (22,8 милиони евра) на сметка во Централниот депозитар за хартии од вредност, како што налага регулативата. Понудата за преземање е активна од вчера, а ќе трае до 10 октомври годинава и ќе се смета за успешна доколку бидат преземени 273.295 акции, кои  претставуваат 70,03 проценти од вкупниот број акции. Притоа, преземачот и лицата што дејствуваат заедно со него би поседувале 75 проценти плус една акција од вкупниот број издадени акции од „Стопанска банка“ АД Битола.

Како е одредена понудената цена за акциите?

Од „Алта банка“ висината на откупната цена на акциите ја одредиле врз основ на највисоката цена што банката и поврзаните лица ја платиле за акциите што веќе ги купиле од „Стопанска банка“ АД Битола во последните 12 месеци пред известувањето за намерата за преземање.  

„Понудената цена од 3.777 денари за акција е повисока од просечната цена на обичните акции издадени од ’Стопанска банка‘ АД Битола постигната на Македонската берза во последните 12 месеци пред известувањето за намерата за преземање“, се наведува во понудата.

Во неа се додава дека на имателите на акции нема да им се наплаќаат трошоци за прифаќање на понудата за преземање односно сите трошоци во врска со понудата за преземање ги презема „Алта банка“.

Кои се најголеми акционери во „Стопанска банка“ АД Битола?

Во проспектот за преземање се објавени и имињата на десетте најголеми поединечни акционери во „Стопанска банка“ АД Битола, чија одлука за прифаќање односно одбивање на понудата за преземање би можела да има значително влијание врз крајниот исход. Убедливо најголем акционер е компанијата „Пелистерка“, која поседува 16,99 проценти од вкупниот број акции.

Инаку, кога станува збор за целосната акционерска структура, податоците на Централниот депозитар за хартии од вредност покажуваат дека во неа доминираат домашни акционери.

Какви резултати има „Стопанска банка“ АД Битола?

Во првото полугодие на 2025 година, „Стопанска Банка“ АД Битола оствари добивка од 33,6 милиони денари (546.000 евра), што главно се должи на засилената наплата на нефункционалното портфолио на банката, како и на пониското ниво на исправка на вредност на нефункционални пласмани во однос на претходната година.  Капиталната и ликвидносната позиција беа значајно зајакнати, при што стапката на адекватност на капиталот се искачи на 32,1 проценти, а ликвидната актива достигна 46,6 проценти од вкупната актива на банката.

„Сепак, банката во последните две години минуваше низ специфичен период, т.е. низ процес на пронаоѓање стратешки инвеститор, како определба дефинирана во деловната политика, развојниот и финансискиот план на банката за 2025-2027 година. Фокусот беше кон поголема наплата на кредитите, решавање на нефункционалното портфолио, внимателно кредитирање заради подобрување на квалитетот на кредитното портфолио, како и зајакнување на ликвидносните позиции. Ваквата состојба имаше одраз врз нивото на кредитирање и врз приходите од редовното работење“, соопштија од банката во коментарот на финансиските резултати за првото полугодие од годинава.

Какви се плановите на „Алта банка“?

Во проспектот се наведува дека во случај на успешно завршување на постапката за преземање, „Алта банка“ планира спроведување постепена модернизација на работењето и зајакнување на капацитетите на „Стопанска банка“ АД Битола, со одредени промени во постојната организациска структура.

Се предвидува промените да опфатат оптимизација на деловните процеси и дигитална трансформација, со цел унапредување на ефикасноста на корисничкото искуство; зајакнување на кадровските капацитети преку селективно вработување и преквалификација, особено во областите ИТ, аналитика и маркетинг, додека постојните вработени ќе бидат поддржани во приспособувањето на новите барања; постепена модернизација на продажната мрежа, вклучувајќи и ребрендирање и оптимизација, но без драстични промени во бројот или локацијата на филијалите.

„Овој пристап има цел да ги зачува стабилноста и континуитетот работењето, истовремено обезбедувајќи ги неопходните технолошки и организациски надградби што ќе го позиционираат целното друштво за одржлив и стабилен развој во иднина“, се наведува во проспектот.

Во однос на политиката на вработување се наведува дека е планирано зголемување на бројот на вработени, во согласност со планираните деловни потреби, пазарните очекувања и идентификуваните барања.

„Посебен акцент ќе биде ставен на развојот на дигиталните компетенции на вработените. Приоритетот ќе биде насочен кон зајакнување на стручните капацитети во корпоративниот сегмент, со посебен фокус на вработување и професионален развој на квалификуван кадар ангажиран во работа со мали и средни претпријатија (SME)“, се наведува во документот.

Планот е континуирано да се инвестира во обука на вработените, што треба да го подигне нивото на технички и практични знаења и вештини на вработените. Планирано е целно ангажирање стручњаци од областа на информациските технологии, аналитиката и маркетингот, со цел да се обезбеди поефикасна примена на современите технологии и да се унапреди целокупната понуда на производи и услуги на банката.

„Во рамките на планираната реорганизација на продажната мрежа - која подразбира ребрендирање, затворање непрофитабилни локации и отворање нови експозитури на пазарно поатрактивни локации - апсолутен приоритет ќе биде зачувувањето на работните места преку внатрешна прераспределба и дополнителна обука на вработените. Исто така, предвидено е именување дополнителен член на Управниот одбор, со што дополнително ќе се зајакне управувачкиот капацитет на целното друштво и ќе се обезбеди поддршка за реализација на амбициозните планови за раст и модернизација“, пишува во проспектот. Преземачот е уверен дека ваквиот пристап - избалансиран и флексибилен раст на вработените, системски развој на дигиталните вештини и внимателно спроведена реорганизација на продажната мрежа - ќе придонесе за долгорочно зајакнување на профитабилноста на целното друштво и изградба на стабилно, поттикнувачко и професионално работно опкружување за сите вработени.

Во моментов нема коментари за веста. Биди прв да коментира...

Остави коментар