КХВ дозволи „Алта банка“ да даде понуда за преземање на „Стопанска банка Битола“

Комисијата за хартии од вредност на последната седница донесе  решение со кое на „Алта банка“ АД Белград и се издава дозвола за давање понуда за преземање на „Стопанска банка“ АД Битола.

„Понудата за преземање се однесува на 371.538 обични акции со право на глас издадени од ‚Стопанска банка‘АД Битола, кои заедно со 19.439 обични акции  со право на глас кои ги поседуваат преземачот и лицата со кој тој дејствува заеднички претставуваат 100 проценти од нејзината основна главнина“, информира КХВ.

Преземањето на хартиите од вредност ќе се врши по цена од 3.777 денари по акција. Според преземачот, понудата ќе се смета за успешна доколку биде прифатена од акционери кои поседуваат најмалку 273.795 обични акции кои претставуваат 70,03 проценти од вкупниот број обични акции со право на глас издадени од „Стопанска банка“ АД Битола.

При тоа, преземачот и лицата кои дејствуваат заеднички со него би поседувале 75 проценти плус една акција од вкупниот број обични акции со право на глас издадени од „Стопанска банка" АД Битола.