КХВ ја запре постапката за преземање на „Стопанска банка Битола“ поради промена на преземачот

„Стопанска банка“ АД Битола вчера добила известување од Комисијата за хартии од вредност дека се запира постапката за преземање на банката од страна на српската „Алта Груп“ поради промена на преземачот во рамките на истата групација.

„Во конкретниот случај, преземачот во барањето за запирање на постапката истакнал дека останува при намерата за преземање на ‚Стопанска банка‘ АД Битола, односно не се откажал од намерата за преземање, туку само врши промена на преземачот во рамките на истата групација“, наведуваат од банката.

„Блумберг Адрија“ веќе пишуваше дека во мај годинава „Алта Груп“ ДОО Београд обелодени дека има намера да даде понуда за преземање до 100 проценти од обичните акции со право на глас издадени од „Стопанска банка“ АД Битола по цена од 3.777 денари по акција. Сепак, пред неколку дена како преземач се јави „Алта банка“, која е дел од српската групација. Српската банка заедно со поврзаните лица веќе поседува 19.439 обични акции или 4,97 проценти од вкупниот број на обични акции издадени од „Стопанска Банка“ АД Битола. За постапката за преземање освен од македонските, се чека зелено светло и од српските надлежни институции.