„Втора среќа“ за „Стопанска банка Битола“: Ќе има ли нов играч во банкарскиот сектор?

Ќе успее ли српската „Алта Груп“ да ја преземе „Стопанска банка Битола“ е прашање кое заслужува внимание откако минатата недела беше обелоденето дека српската групација сака да преземе 100 проценти од обичните акции со право на глас издадени од македонската банка по цена од 3.777 денари по акција. Посебно е интересно што понудата за преземање, која би требало да се официјализира откако ќе бидат реализирани сите потребни регулаторни барања, доаѓа неполна година откако неуспеа обидот на „Комерцијална банка“ да ја преземе „Стопанска банка Битола“.

„Алта Груп“ нуди 577 денари повеќе по акција од „Комерцијална банка“

На 26 август минатата година „Комерцијална банка“ објави понуда за преземање на 100 проценти од акциите на „Стопанска банка Битола“ по цена од 3.200 денари по акција. Понудената цена беше приближна на цената по која во тој период се тргуваа акциите на банката на берзата. За да биде успешна понудата беа потребни минимум 67 проценти плус една акција, што е релативно висок праг.  

За понудата на „Комерцијална банка“ позитивно се изјаснија 149 акционери во чија сопственост биле вкупно 176.154 обични акции, што претставува околу 45 проценти од вкупно издадените обични акции на „Стопанска банка Битола“. На крајот на септември минатата година понудата за преземање беше прогласена за неуспешна со што се затвори целокупната постапка.

„Пелистерка“ е единствен крупен акционер во „Стопанска банка Битола“

Според податоците на Централниот депозитар за хартии од вредност заклучно со 26.05.2025 година единствен акционер кој поседува над пет проценти од акциите во „Стопанска банка Битола“ е компанијата „Пелистерка“. Мнозински акционер во „Пелистерка“ којшто поседува 89,6 проценти од акциите е трговското друштво за вработување на инвалидни лица за производство и трговија „ЦИП ПРОДУКТ“ ДООЕЛ Скопје зад кое стои бизнисменот Цветан Панделески.  

Инаку, просечната цена на акциите на „Стопанската банка Битола“ се зголеми од почетокот на годината до сега од 3.000 денари на 3.400 денари, а врв од 3.920 денари по акција достигна на 29 април годинава.

Какви резултати бележи „Стопанска банка Битола“?

„Стопанска банка Битола“ лани оствари добивка по оданочување од 163,17 милиони денари (2,6 милиони евра), што претставува значајно подобро остварување споредено со истиот период од минатата година, кога работеше со загуба од 189,82 милиони денари (3 милиони евра).

„Позитивниот финансиски резултат се должи на задржаниот висок оперативен резултат, засилената активност за наплата на нефункционалното портфолио на банката, како и на пониското ниво на исправка на вредност на нефункционални пласмани во однос на претходната година“, соопштија од банката.

Оттаму посочија дека нето-приходите од камати бележат зголемување за 2,54 проценти во однос на остварувањето од минатата година. Нето-приходите од провизии и надоместоци се пониски за 24,26 проценти споредено со остварувањето од истиот период од минатата година, што главно се должи на зголемените тарифи на добавувачите на услуги на банката. Нето-приходите од курсни разлики се пониски за 16,96 проценти споредено со истите од минатата година. Останатите приходи од дејноста се повисоки за 24,70 проценти во споредба со 2023 година, како резултат на остварени капитални добивки од продажба на преземен имот.

Странци „се тепаат“ да влезат во македонскиот банкарски сектор

„Блумберг Адрија“ неодамна го праша Мирослав Марчев, управен партнер во ПвЦ (PwC) За Македонија во кој дел од финансискиот сектор во нашата земја постои интерес за стекнување или основање нови бизниси. Тој одговори дека тоа е дефинитивно банкарскиот сектор. Марчев додаде дека во ПвЦ постојано имаат клиенти и потенцијални клиенти, меѓу кои банкарски друштва и фондови што не се присутни на овие простори, а кои би сакале да имаат банка во земјава. Во однос на причините за интересот, Марчев објасни дека некои од нив сакаат да ја имаат Македонија во боите на својата корпоративна мапа, а други сакаат да имаат банка во земјава за да бидат чекор поблиску до Европската Унија.

„Интерес има голем. Тука доаѓа прашањето зошто нема трансакции. Основната причина зошто нема нови трансакции се преголемите ценовни очекувања на сопствениците на банките“, вели Марчев.

Сепак, тој додава дека во ПвЦ очекуваат во одреден момент да има некакво раздвижување.

„Извесно е дека потенцијалниот купувач и потенцијалниот продавач ќе се договорат и трансакција ќе има“, вели Марчев.