Ворен Бафет тивко се повлекува: Додека сум жив ќе донирам

Ворен Бафет, милијардерот што претвори стара текстилна фабрика во конгломерат вреден над билион долари, соопшти дека ќе престане да пишува годишни писма и да присуствува на состаноците на својата компанија, „Беркшир Хатавеј“ (Berkshire Hathaway), поради заминувањето во пензија. Бафет, кој во моментов има 95 години, ќе ја напушти својата позиција на извршен директор на крајот од годинава, а за негов наследник е именуван долгогодишниот заменик Грег Ејбл.

Во писмо во кое објави дека ќе им донира повеќе од 1,3 милијарда долари на четири семејни фондации, Бафет, познат како Пророкот од Омаха, ја истакна својата желба да се фокусира повеќе на хуманитарни активности во својата последна фаза од животот. Иако се чувствува добро, тој вели дека ќе ја забрза динамиката на донирање за да ги поддржи своите деца и нивните фондации.

„Претходно моето целокупно богатство беше насочено кон компанијата, но сега ќе ги забрзам донациите до моите деца и нивните фондации додека сè уште сум жив“, напиша Бафет во писмото.

Наследството на Бафет

Најголемиот дел од неговото богатство ќе им биде пренесен на неговите деца – Сузи, Хауард и Питер Бафет – кои се во своите 60-ти и 70-ти години. Бафет смета дека нивната зрелост и искуство ги прават способни да го раководат неговото наследство, а тој верува дека ќе продолжат да управуваат со богатството мудро и одговорно.

„Тие имаат доволно мудрост, енергија и инстинкти да го распределат овој голем имот“, рече Бафет.

Како што најави Бафет, Грег Ејбл ќе стане новиот извршен директор на „Беркшир Хатавеј“, а тој ќе остане на позицијата претседател на компанијата. Бафет изрази целосна доверба во Ејбл, нарекувајќи го идеален избор за управување со компанијата и инвестициите.

„Не можам да замислам ниту еден менаџер, консултант или академик што би бил подобар од Грег за да управува со вашето и моето богатство“, напиша Бафет во своето писмо.

Со текот на времето, Бафет стана познат по своите огромни филантропски донации, најмногу преку фондацијата „Гејтс“ и фондациите на неговите деца. Тој, заедно со Бил Гејтс, ја започна иницијативата „Гивинг плеџ“ (Giving Pledge), која има цел да се донира најголемиот дел од богатството во текот на животот или по смртта.

Во последните години Бафет најави дека нема повеќе да донира во фондацијата „Гејтс“, туку неговите деца и нивните фондации ќе го преземат управувањето со новите хуманитарни акции.