Српската „Алта груп“ сака да ја преземе „Стопанска банка Битола“

Управниот одбор на „Стопанска банка Битола“ вчера добил известување од „Алта Груп“ ДОО Београд  дека има намера да даде понуда за преземање до 100 проценти од обичните акции со право на глас издадени од „Стопанска банка Битола“. Понудата за преземање до 100 проценти од обичните акции со право на глас издадени од „Стопанска банка Битола“ ќе биде дадена по цена од 3.777 денари по акција. 

„Во добиеното известување стои дека согласно член 26-а од Законот за преземање на акционерски друштва покрај согласностите од домашните тела и институции вклучувајќи, но не ограничувајќи се на претходна согласност од Народната банка на Република Северна Македонија, понудата е условена и со претходно одобрување на концентрација од страна на Комисијата за заштита на конкуренцијата на Република Србија (странско одобрение)“, соопшти банката.

Оттаму додаваат дека во известувањето стои дека ќе биде поднесено и барање за добивање на дозвола за понуда за преземање до Комисијата за хартии од вредност, по добивање на странското одобрение, а секако по добивање на согласностите од домашните тела и институции.

„Доколку странското одобрение не биде добиено, намерата ќе се смета за повлечена и нема да биде дадена понуда за преземање. Во однос на странското одобрение, доколку надлежната институција за давање на странското одобрение отфрли или одбие издавање на соодветно странско одобрение, или не го издаде во рок од 12 месеци од објавата на намерата за преземање, ‚Алта Груп‘ ДОО Београд ќе извести соодветно согласно член 26-а, став 6 од Законот за преземање на акционерски друштва“, наведуваат од банката.

Инаку во рамките на „Алта груп“ функционираат „Алта банка“, институцијата за електронски пари „Алта пеј“, „Алта лизинг“ и „Алта менувачници“. Станува збор за групација зад која стои српскиот бизнисмен Давор Мацура.

Ова е втор обид за преземање на „Стопанска банка Битола“ за помалку од една година. „Блумберг Адрија“ пишуваше дека понуда за преземање лани имаше и од „Комерцијална банка“ АД Скопје, но таа заврши неуспешно.