Српската „Алта банка“ чека зелено светло за преземање на „Стопанска банка Битола“

Српската „Алта банка“ има намера да даде понуда за преземање до 100 проценти од обичните акции со право на глас издадени од „Стопанска банка Битола“, соопшти компанијата преку Македонската берза. Понудата за преземање ќе биде дадена по цена од 3.777 денари по акција. „Алта банка“ заедно со поврзаните лица поседува 19.439 обични акции или 4,97 проценти од вкупниот број на обични акции издадени од „Стопанска Банка Битола“.

„Согласно член 26-а став 3 од Законот за преземање на акционерските друштва, напоменуваме дека покрај согласностите кои се потребни од домашните овластени органи, тела и институции, вклучувајќи, но не ограничувајќи се на претходната согласност од Народната банка на Република Северна Македонија, давањето на понудата за преземање е условено со претходно одобрување на стекнување од страна на Народна банка на Србија („странско одобрение")“, укажуваат од банката.

Оттаму додаваат дека одобрување од Комисијата за заштита на конкуренцијата на Република Србија веќе е добиено.

„Согласно член 26-а став 4 од Законот за преземање на акционерските друштва, ‚Алта банка‘ ќе поднесе барање за добивање на дозвола за понудата за преземање и проспектот до Комисијата за хартии од вредност согласно Законот за преземање на акционерските друштва откако ќе биде добиено странското одобрение, а секако по добивање на согласностите кои се потребни од домашните овластени органи, тела и институции вклучувајќи, но не ограничувајќи се на претходната согласност од Народната банка Република Северна Македонија“, наведуваат од банката.

Од „Алта банка“ посочуваат дека доколку странското одобрение не биде добиено, намерата ќе се смета за повлечена и нема да биде дадена понуда за преземање.

Во моментов нема коментари за веста. Биди прв да коментира...

Остави коментар