Српската „Алта банка“ влегува на македонскиот пазар со купување на „Стопанска банка Битола“

Финансиската институција „Алта банка“ АД Белград направи стратешки чекор кон регионална експанзија со влегувањето на пазарот на Северна Македонија, преку претходно објавеното преземање на „Стопанска банка“ АД Битола. Преземањето доаѓа како потврда на мисијата на банката да стане регионален лидер во обезбедувањето модерни и достапни финансиски услуги.

„Ова не е само чекор кон експанзија, ова е потврда за нашата амбиција да ја обликуваме иднината на банкарството во регионот. ‚Алта група‘ расте со јасна цел, да биде двигател на промените, столб на стабилноста и лидер во иновациите. Веруваме дека им нудиме на клиентите не само услуги, туку и вредности што го менуваат начинот на кој ја доживуваат банката - како партнер, како поддршка, како дел од секојдневниот живот“, рече Давор Мацура, претседател на Управниот одбор на „Алта банка“ и сопственик на „Алта група“.

Според него, влегувањето на пазарот на Северна Македонија е природно продолжение на патот на „Алта група“, а ова преземање е „темел за силна, поврзана и модерна финансиска мрежа на Балканот“.

Мацура додаде дека се надева дека започнатата постапка ќе биде успешно завршена и дека процесот на интеграција е планиран да се спроведува систематски и транспарентно, со посебен фокус на зачувување на континуитетот на работењето и постепено воведување иновации.

Врз основа на одобрението издадено од Народната банка на Република Северна Македонија на 1 септември 2025 година, за стекнување на 100 проценти од акциите во „Стопанска банка“ АД Битола, „Алта банка“ достави проспект и официјална понуда до Комисијата за хартии од вредност на Република Северна Македонија. „На седницата одржана на 10 септември, Комисијата ја одобри понудата за преземање на целото портфолио на акции, со што се отвори патот за почеток на прием на понуди за купување - планирано за 11 септември 2025 година“, објави „Алта Груп“.

Како што се додава, купувањето ќе се спроведе со учество на „Комерцијална банка“ АД Скопје, овластен брокер кој ја претставува „Алта банка“ во оваа постапка.

„Алта група“ објави дека се позиционирала како водечка институција во областа на електронските плаќања и платните трансакции во Србија, со континуиран раст и исклучителни резултати што го зајакнуваат нејзиниот лидерски статус.

„Со влегувањето на ‚Стопанска банка‘ АД Битола во групата по завршувањето на постапката, ‚Алта банка‘ ја потврдува својата посветеност на развојот и зајакнувањето на финансиската инфраструктура во регионот. Оваа соработка ќе донесе нови можности за подобрување на бизнисот, ќе ја стимулира дигиталната трансформација и развојот на иновативни решенија на северно македонскиот пазар“, заклучуваат оттаму.