ХСБЦ (HSBC) го купи бизнисот на „Силикон валеј банк“ - СВБ (Silicon Valley Bank / SVB) во Велика Британија за една фунта, беше објавено во понеделникот наутро.
Со овој потег ХСБЦ добива банка со кредити од околу 5,5 милијарди фунти и депозити од околу 6,7 милијарди фунти. СВБ УК (SVB UK) минатата година оствари добивка пред оданочување од 88 милиони фунти, се вели во соопштението.
Прочитајте повеќе: Пропаѓањето на СВБ шири паника меѓу компаниите
„Оваа аквизиција е одличен стратегиски чекор за нашиот бизнис во Британија. Ја зајакнува нашата франшиза за комерцијално банкарство и ја подобрува нашата способност да им служиме на иновативните и брзорастечки компании, вклучувајќи ги и технолошкиот и научниот сектор во Британија, но и на меѓународно ниво“, рече извршниот директор на ХСБЦ, Ноел Квин, додавајќи дека клиентите на СВБ УК можат да продолжат со банкарските активности како и обично, знаејќи дека нивните депозити се поддржани од силата и сигурноста на ХСБЦ.
Продажбата ја потврди и британскиот министер за финансии Џереми Хант, кој истакна дека во целата приказна не биле искористени јавни пари.
Се огласија и од Банката на Англија (БоЕ), велејќи дека „банкарскиот систем на Обединетото Кралство останува безбеден, здрав и добро капитализиран“.
„Една третина од најголемите британски фирми за ризичен капитал соработувале со банката ’Силикон валеј’“, изјави Мајкл Мур, шеф на Британската асоцијација за приватен и ризичен капитал, за Блумберг ТВ. „Од нив, 40 отсто се соочуваат со непосредни тешкотии, како што е неисплата на платите“, нагласи тој.
„Британските фирми имаат околу 2,5 милијарди фунти депозити заклучени во СВБ“, посочи Мур, повикувајќи се на истражувањето на неговата групација за 1.000 компании.
.webp){kind=icon}
