Сите детали за колапсот на СВБ и како се справува ФЕД со кризата

Колапсот на „Силикон валеј банк“ (SVB / СВБ) беше брз и безмилосен и предизвика голем дел од светот да се прашува што може да се случи следно. Колапсот на единствената комерцијална банка фокусирана на Силициумската Долина и стартапите предизвика превирања и во технолошката и во финансиската индустрија.

Стравувајќи дека ситуацијата може да ја потресе индустријата, американската централна банка (ФЕД), Министерството за финансии и Федералната агенција за осигурување на депозити (FDIC / ФДИЦ) дејствуваа брзо во текот на викендот за да ги заштитат депозитите на клиентите и да ја зајакнат довербата во банкарскиот систем. Ви пренесуваме преглед на сите информации што моментално се достапни за второто најголемо пропаѓање на американска банка во историјата.

Како пропадна СВБ?

Матичната компанија „СВБ фајненшл груп“ (SVB Financial Group) минатата среда објави дека продала хартии од вредност од своето портфолио во висина од 21 милијарда долари, со загуба од 1,8 милијарда долари, и дека ќе продаде 2,25 милијарди долари нови акции за да ги зајакне своите финансии. Најавата предизвика страв кај истакнати инвеститори во ризичен капитал како Питер Тиел, кој на клиентите им даде инструкции да ги повлечат депозитите од банката. Само два дена подоцна, банката се откажа од обидот да собере свеж капитал или да најде нови клиенти, а СВБ беше ставена во стечај, предизвикувајќи морници во банкарската индустрија.

Што значи колапсот на СВБ за штедачите?

Бидејќи ликвидноста на финансискиот систем беше под лупа, САД ветија дека целосно ќе ги заштитат парите на сите штедачи во СВБ, во обид да го запрат налетот кон другите финансиски институции. Потегот на ФЕД беше особено важен за штедачите што на своите сметки имаат повеќе од 250.000 долари, што обично е праг за исплати на осигурување и е праг за повеќето банкарски депозити во САД. Владата соопшти дека клиентите ќе имаат пристап до  својата готовина на 13 март и дека даночните обврзници нема да бидат одговорни за какви било загуби настанати како резултат на навалата во банката.

Дали кризата ќе се прошири и на други банки?

По падот на СВБ, цените на акциите на голем број други регионални заемодавци паднаа поради страв од слично сценарио, додека висок функционер во Министерството за финансии предупреди дека и другите банки се во слична ситуација како СВБ. Во неделата, заедно со ветувањето дека ќе ја заштити готовината на штедачите, ФЕД објави програма за итни заеми за да обезбеди полесни услови за краткорочни заеми за банките со ограничени пари.

Што се случи со „Силвергејт“ (Silvergate) и „Сигначур“ (Signature)

Додека СВБ пропадна минатата недела, другите две банки се бореа за опстанок. И „Силвергејт“ (Silvergate Capital) и „Сигначур“ (Signature Bank) на крајот станаа жртви на нивните врски со криптосветот. „Силвергејт“ најави дека ќе престане со работа и ќе се ликвидира откако падот на криптоиндустријата, поттикнат од колапсот на FTX, ја намали финансиската моќ на банката и предизвика драстичен пад на цената на акциите. Регулаторите на државата Њујорк ја затворија „Сигначур“ во неделата, по масовниот одлив на депозити во петокот. Таму штедачите ќе ја имаат истата заштита како оние во СВБ.

Што ќе се случи со СВБ?

Откако СВБ стана втората најголема американска банка што пропадна, по „Вашингтон мјучуал“ (Washington Mutual), чиј колапс се случи за време на финансиската криза во 2008 година, средствата на СВБ беа ставени на лицитација. Истата таа требаше да заврши во неделата. Сè уште не се знае дали имало понудувачи.

Кој е следниот потег на ФЕД?

По помалку од една недела откако претседателот на ФЕД, Џером Пауел, одново тргна да ги зголемува каматните стапки, продолжувањето на тој тренд одеднаш изгледа помалку веројатно. Инвеститорите сега се обложуваат дека шоковите на финансискиот систем ќе навестат зголемување на каматните стапки помало од очекуваното, бидејќи ФЕД ќе ја балансира загриженоста за финансискиот стрес со пониската инфлација.

Каков ефект имаше колапсот на СВБ во странство?

Иако владините пакети за спас можеби внесоа живост во американскиот банкарски систем, вниманието сега е фокусирано на глобалното влијание на банката. Властите во Британија наведоа дека ќе обезбедат итна поддршка за штедачите за да им овозможат на компаниите да го плаќаат персоналот и да ги исполнат обврските за готовинскиот тек, без да дадат дополнителни детали. Заедничкото вложување на СВБ во Кина со СПД (SPD) сега е доведено во прашање, иако банката се обидува да ги смири локалните инвеститори, потсетувајќи ги дека операциите се независни и стабилни.

Како реагираа глобалните пазари на американските потези?

Фјучерсите на американските акции пораснаа повеќе од еден процент, а државните обврзници пораснаа по веста дека САД ќе ги поддржат штедачите и ќе го зајакнат банкарскиот сектор. Додека доларот падна, јенот зајакна, а златото поскапе во услови кога инвеститорите бараат засолниште од пазарните превирања.

Во моментов нема коментари за веста. Биди прв да коментира...

Остави коментар