.webp){kind=icon}
Годишната стапка на инфлација во јуни се искачи на 12,1 отсто, објави државниот завод за статистика на Хрватска. Високата стапка се должи на растот на цените, посебно на енергенсите и храната. Во однос на мај, стапката е повисока за 1,1 отсто.
На годишна основа, гледано по поединечни категории на производи и услуги, најмногу поскапел превозот за 20,3 отсто, потоа следат храната и безалкохолните пијалоци за 16,9 отсто, па цените во рестораните и хотелите, за 14,6 отсто.
Најголем продонес во растот имаат цените на храната и безалкохолните пијалоци од 4,38 процентни поени, превозот од 2,99, потоа одржување на домаќинството и комуналии од 1,62 поени, се наведува во соопштението.
Јунската стапка на инфлација е продолжение на забрзувањето на растот на цените откако во мај стапката на инфлација изнесуваше 10,8 отсто. „Зголемувањето на годишната стапка на раст произлегува од дополнителните покачувања на цените на храната и горивата и сезонските поскапувања во туристичкиот сектор кои оваа година се дополнително засилени по зголемувањето на влезните трошоци“, коментира аналитичкиот тим на Bloomberg Adriа.
Ова сугерира дека овогодишниот просек на инфлацијата ќе изнесува околу 10 отсто, проценуваат аналитичарите. Во останатиот дел од годината се очекува глобалното слабеење на стопанската активност да почне да ги намалува цените на стоките и со тоа да го ублажи инфлаторниот притисок. „Клучен ризик за таквото сценарио е геополитичката стабилност – намалена понуда на стока би дејствувала спротивно. На централните банки, како и на Народната банка на Хрватска останува притисокот преку стегање на политиките да ја ублажат инфлацијата. Како резултат на тоа се очекува дополнителен раст на каматните стапки“, велат аналитичарите.
На месечна основа најмногу во просек се пораснати цените во хотелите и рестораните, за 3,5 отсто, превозот за 2,1, потоа рекреација и култура за 1,8 отсто. Од останатите категории, цените на облеката и обувките бележат пад од 2,7 отсто.
