.webp){kind=icon}
Народната банка за последен пат годинава одлучува за каматните стапки. ЕЦБ и Фед претходната недела ги задржаа стапките на исто ново, со очекувања дека во првата половина од 2024 година ќе има прво намалување по циклусот на зголемување. Каква одлука ќе донесе Народната банка?
Добро утро! Ова се петте вести што треба да ги знаете на почетокот од денот.
Народна банка на стендбај и денеска, два квартала до олабавување
Комитетот за оперативна монетарна политика денеска има состанок на кој ќе ги разгледува економските податоци и ќе ги преиспитува основите на монетарната политика, но повеќе од извесно е дека и по денешниот состанок каматата на благајничките записи ќе се задржи на ниво од 6,3 отсто.
Според нашите прогнози, првото намалување на основната камата најверојатно ќе се случи во третиот квартал следната година, а дотогаш не би требало да има ниту зголемување на стапките. И во регионот Адрија преовладува расположението „повисоки камати на подолг период“ бидејќи стапките на инфлација сè уште се во црвената зона.
Од јануари: Ако доцните за еден кредит, ќе имате проблем и со другиот
Ако досега уредноста на отплатата кај еден клиент се следела одделно, по користен продукт, од 1 јануари ќе се следи вкупниот износ што клиентот го должи во таа банка. Во согласност со новата регулатива, за нефункционална кредитна изложеност се смета достасан долг повеќе од 90 дена во континуитет, при што вкупниот износ на достасани обврски треба да е поголем од 30.000 денари и да надминува 1 отсто од целокупната искористена кредитна изложеност во банката.
Воведувајќи ги овие измени, од Народната банка потенцираа дека станува збор за регулаторни барања што почнале да се применуваат во Европската Унија, а кои треба да ја зајакнат стабилноста на банкарскиот систем. Има новини и во однос на реструктурирањето на кредитните изложености на банките кон клиентите што се соочуваат со финансиски тешкотии.
Осигуреници за еден месец наплатија девет милиони евра од штети покриени со осигурување
Осигурителните компании исплатиле 132,3 милиони денари (2,15 мил. евра), а исплатени се вкупно 710 штети. Најголемата меѓу нив е со вредност од 56 милиони денари (900.000 евра), која една осигурителна компанија ја исплатила како обесштетување за настанат пожар во објект на компанија.
За возила со каско-осигурување осигурителните компании во ноември исплатиле 790 штети во вкупна вредност од 72,3 милиони денари (1,17 мил. евра). Тоа е за 28 отсто повеќе исплатени средства за штети во таа класа осигурување во споредба со истиот месец лани. Најголем број штети осигурителните друштва исплатиле по основа за приватно здравствено осигурување.
Расположението на германските бизнисмени падна за првпат од август
Расположението меѓу германските бизнисмени се влоши за првпат од август, што не навестува добро за оние што мислат дека најголемата економија во еврозоната би можела да почне да закрепнува на почетокот на следната година. Индексот на очекувања, кој го мери институтот „Ифо“, падна од 85,1 на 84,3 во декември, додека аналитичарите очекуваа мал пораст.
Зголемувањето на каматните стапки од страна на Европската централна банка (ЕЦБ) ја погоди и германската економија. Сега се очекува централните банкари да ги намалат трошоците за задолжување неколкупати во текот на 2024 година, што би можело да ѝ помогне на германската економија да го достигне нивото.
ЕУ започна официјална истрага за мрежата X на Илон Маск
Европската Унија отвори постапка за прекршување на социјалната мрежа Х на Илон Маск, порано позната како Твитер. Одлуката е донесена поради наводно прекршување на обврските на Х во однос на транспарентноста и должноста за борба против незаконски содржини и дезинформации.
Официјалната постапка за прекршување беше започната според Законот за дигитални услуги „врз основа на досега спроведената прелиминарна истрага, вклучувајќи ја и анализата на извештајот за процена на ризикот што го доставивме до мрежата Х во септември“. Меѓу другото, предупредувањата се однесуваат на ширење незаконски содржини во контекст на терористичките напади на Хамас врз Израел, се наведува во соопштението на ЕУ.
