И покрај доминантниот позитивен став кон Европската Унија, младите луѓе во Македонија се сè поскептични дека земјата ќе стане членка на ЕУ во блиска иднина. Ова го покажуваат резултатите од анкета спроведена кон крајот на јуни 2025 година, во која учествувале над 1.000 млади од земјава, главно студенти.
Истражувањето е дел од заедничка иницијатива на Институтот за добро управување и евроатлантски перспективи (ИДУЕП – Скопје), Европскиот центар за извонредност (ЕЦЕ – Брисел), германската фондација „Фридрих Науман“ и македонската младинска платформа „Студентарија“.
Поделеност во перцепцијата за ЕУ
Анкетата покажува дека 41 отсто од младите имаат позитивен став кон Европската Унија, додека 24 отсто се изјасниле негативно, а 35 отсто се неутрални. Овој податок укажува на простор за дополнителна комуникација и ангажман од страна на институциите.
Сепак, кога станува збор за очекувањата за членството на Македонија во ЕУ, резултатите се поразителни: речиси половина (46,5 отсто) не веруваат дека земјата воопшто ќе стане членка, додека 35,8 отсто веруваат дека тоа може да се случи, но дури во подалечна иднина. Само 6,7 отсто мислат дека Македонија ќе се приклучи кон ЕУ во наредните пет години.
Анкета
Корупцијата – најголема пречка за ЕУ-интеграцијата
На прашањето кои се најголемите пречки за пристапувањето во ЕУ, дури 84,6 отсто од младите ја посочуваат корупцијата како најсериозен проблем. Потоа следуваат билатералните спорови (61 отсто) и ниската доверба во институциите (60 отсто). Овие податоци јасно ја рефлектираат перцепцијата дека внатрешните проблеми се многу поголема закана за европската иднина отколку надворешните услови.
Анкета
Што ги интересира младите за ЕУ?
Најголем интерес кај младите предизвикуваат темите поврзани со можностите за работа и живот во ЕУ (76,2 отсто). Потоа следуваат програмите за образование како Еразмус+ (55,1 отсто), заштитата на човековите права (50 отсто), животната средина (48,1 отсто), дигитализацијата и иновациите (44,5 отсто) и културната размена (32,2 отсто).
Во однос на информираноста, 53 отсто изјавиле дека се доволно запознаени со вредностите и политиките на ЕУ, додека само 3,5 отсто рекле дека не се информирани воопшто.
Подготвеност за дијалог – но и резерва
На прашањето дали би сакале да учествуваат во дијалог со претставници на ЕУ, 41,6 отсто од младите одговориле потврдно, што укажува на значителна отвореност за директна комуникација. Сепак, 30,5 отсто рекле дека не би се вклучиле во таков дијалог, додека 27,9 отсто не се сигурни.
Кој ќе влезе во ЕУ прв?
Според перцепцијата на младите, прва земја од Западен Балкан што ќе стане членка на ЕУ најверојатно е Албанија (53,2 отсто), потоа Црна Гора (34,5 отсто) и Србија (14,7 отсто). Македонија како потенцијален член во следните пет години ја гледаат само 8,2 отсто од испитаниците.
Апел за конкретна акција
„Овие резултати се сериозен аларм и повик за акција. Ако не им се понудат реални можности, стабилност и разбирање, младите од земјите кандидати за членство е можно сѐ помалку да гледаат иднина во евроинтеграциите“, изјави Бојан Кордалов, комуниколог и директор за политики и комуникации во Европскиот центар за извонредност.
Истражувањето ќе резултира со тематска публикација и сет препораки за националните и ЕУ-институции за справување со евроскептицизмот кај младите во земјите кандидати.
.webp){kind=icon}
Во моментов нема коментари за веста. Биди прв да коментира...