Русија ги засилува нападите врз Украина, Трамп не сака „залудна средба“ со Путин

Русија изврши повеќекратни напади со дронови и ракети врз Украина, додека најновите обиди за мир од страна на американскиот претседател Доналд Трамп изгледа дека се во застој.

Нападот усмрти најмалку двајца цивили во Киев и повреди десетици низ земјата во раните утрински часови во среда, според воздушната одбрана и локалните власти. На мета биле станбени области и енергетска инфраструктура во главниот град, централниот регион Полтава, како и Запорожје на југ. Погоден бил и пристанишниот град Измаил на Дунав, соопштија официјални лица на Телеграм.

Пред зимата, Москва ги засилува нападите врз енергетската инфраструктура на Украина, уништувајќи повеќе од половина од производството на гас, кое е од суштинско значење за греење.

Чернихив на север и Суми на североисток останаа без вода и електрична енергија неколку дена поради засилените руски напади.

Министерството за енергетика на Украина проценува дека октомври е еден од најтешките месеци во однос на интензитетот на нападите врз електричната мрежа, транспортните мрежи и гасните постројки од почетокот на целосната инвазија на Русија, која трае веќе четврта година.

Најновите напади се случија во време кога планираниот втор самит меѓу Трамп и рускиот претседател Владимир Путин е доведен во прашање. Американскиот лидер во вторникот изјави дека не сака „залудна средба“ со неговиот руски колега, која беше планирана за наредните недели во Будимпешта. Трамп рече дека сè уште не одлучил дали ќе ја откаже средбата, но повтори дека сака - што беше одбиено од Кремљ - да се замрзнат борбите на тековните борбени линии како дел од договор за прекин на огнот.

Украинскиот претседател Володимир Зеленски ќе биде во Стокхолм в среда, каде што бара воена помош, вклучително и противвоздушна одбрана. Лидерите на Европската Унија потоа ќе разговараат за дополнителни санкции против Кремљ, како и за финансиска помош за Украина преку употреба на замрзнатите средства од Централната банка на Русија. Сојузниците на Украина од т.н. Коалиција на подготвените треба да се состанат во петок.

Европските земји работат со Украина на предлог со 12 точки за завршување на војната на Русија по должината на тековните борбени линии, спротивставувајќи се на обновените барања на Путин до САД за Киев да се откаже од територија во замена за мировен договор. Мировен одбор предводен од Трамп би ја надгледувал имплементацијата на предложениот план, според лица запознаени со прашањето.

Одделно, Генералштабот на Украина доцна во вторникот соопшти дека украинските воздушни сили заедно со други единици погодиле хемиска фабрика во рускиот Брјанск, околу 100 км од границата со Украина. Користени биле крстосувачки ракети „сторм шадоу“, се наведува во објава на платформата X.