Од јануари: Ако доцните за еден кредит, ќе имате проблем и со другиот

Од јануари следната година или за само десетина дена стапуваат во сила новините со кои банките на поинаков начин ќе ги утврдуваат нефункционалните кредити на клиентите. Овие промени всушност се однесуваат на сите граѓани што имаат по повеќе кредитни производи од една банка. Ако досега уредноста на отплатата кај еден клиент се следела одделно, по користен продукт, од 1 јануари ќе се следи вкупниот износ што клиентот го должи во таа банка. 

Во согласност со новата регулатива, за нефункционална кредитна изложеност се смета достасан долг повеќе од 90 дена во континуитет, при што вкупниот износ на достасани обврски треба да е поголем од 30.000 денари и да надминува 1 отсто од целокупната искористена кредитна изложеност во банката. Доколку имате нефункционална кредитна изложеност на еден кредитен продукт, ќе значи дека имате нефункционална кредитна изложеност на сите кредитни продукти во банката, информираат од домашните банки.

Како пример, ако имате станбен кредит во една домашна банка и дополнително и некој потрошувачки кредит, а доцните со наплатата на ратите само за потрошувачкиот, ќе се смета дека нефункционален е и станбениот.

Воведувајќи ги овие измени, од Народната банка потенцираа дека станува збор за регулаторни барања што почнале да се применуваат во Европската Унија, а кои треба да ја зајакнат стабилноста на банкарскиот систем. 
Има новини и во однос на реструктурирањето на кредитните изложености на банките кон клиентите што се соочуваат со финансиски тешкотии.  

„Преку спроведувањето на одлуката ќе се овозможи подетално следење на движењата во кредитното портфолио на банките и навремена оцена на потенцијалните ризици за финансиската стабилност“, образложуваат од Народната банка.

Инаку, според податоци од Народната банка, учеството на сомнителните и спорните побарувања во вкупните кредити и натаму се намалува и се сведе на 2,7 отсто во третиот квартал, што е сепак минимално намалување.

Од јули годинава Народната банка воведе и прагови за вкупната задолженост на секој граѓанин. Оттогаш која било банка во државата не смее да му одобри кредит на лице чии месечни рати кон банките надминуваат 55 отсто од неговиот месечен доход ако станува збор за кредит во денари или 50 отсто при одобрување кредит во девизи или со девизна клаузула. „Со оваа мерка се влијае кон намалување на системскиот ризик, при што превентивно се дејствува на спречување евентуална превисока задолженост на секторот домаќинства“, изјавија тогаш од Народната банка за „Блумберг Адрија“. 

Во моментов нема коментари за веста. Биди прв да коментира...

Остави коментар