Банките силно ги заостриле условите за обезбедување кај станбените кредити

Македонските банки очекуваат олеснување на кредитните услови за компаниите во првиот квартал од 2024 година и зголемување на побарувачката за корпоративните кредити, покажува новата анкета за кредитна активност на Народната банка. Истовремено тие очекуваат умерено нето-олеснување на кредитните услови за населението, при изразено нето-зголемување на побарувачката за кредити.

Кога станува збор за кредитната политика, банките укажуваат дека во последниот квартал од минатата година имало нето-заострување на вкупните кредитни услови за компаниите, значително послабо во однос на претходната анкета и намалување на побарувачката за корпоративни кредити, поумерено во споредба со претходната анкета.

„Анализирано од аспект на поединечните услови за кредитирање на претпријатијата, во четвртиот квартал на годината банките укажуваат дека кај повеќето кредитни услови, односно каматната стапка, некаматните приходи, големината на заемот или кредитната линија и кај барањата за обезбедување е забележано послабо нето-заострување во однос на претходната анкета.“, наведуваат од Народната банка.

Нето-заострување на вкупните кредитни услови, малку посилно во споредба со претходната анкета имало и кај кредитите за населението проследено со нето-намалување на побарувачката, поумерено во споредба со претходната анкета.

„Анализирано од аспект на поединечните кредитни услови, се забележува доста послабо нето-заострување кај каматните стапки на станбените кредити, во споредба со анкетата од претходниот квартал, при мало нето-олеснување на каматните стапки на потрошувачките кредити.“, велат од Народната банка.  

Оттаму информираат дека провизиите кај станбените кредити бележат посилно нето-олеснување, за разлика од одговорите дадени од страна на банките во минатата анкета за умерено нето-олеснување.

„Кај потрошувачките кредити, некаматните приходи бележат мало нето-олеснување, за разлика од нето-заострувањето во претходната анкета. Нето-олеснување е забележано кај достасувањето на заемите кај потрошувачките кредити, за разлика од нето-заострувањето во минатата анкета, додека кај станбените кредити нема промена.“, велат од Народната банка.  

Обврските за обезбедување, во овој квартал, забележале посилно нето-заострување на кредитните услови кај станбените кредити, за разлика од умереното нето-олеснување во претходната анкета, додека кај потрошувачките кредити, банките упатуваат на сосема мало нето-заострување, слично како нето-заострувањето наведено во минатата анкета.

„Кај покриеноста на кредитот со обезбедување во рамките на станбените кредити се забележува силно нето-заострување.“, наведуваат од Народната банка.

 

Во моментов нема коментари за веста. Биди прв да коментира...

Остави коментар