Хрватската влада на денешната седница усвои Уредба со која цените на горивата драстично ќе се намалат од ноќеска на полноќ благодарение на минатонеделниот пад на цената на нафтата на меѓународниот пазар. Бензинот од утре ќе чини 12,03 куни (1,6 евра) за литар, дизелот ќе се продава за 12,89 куни ( 1,71 евро) за литар.
По седницата министерот за економија, Давор Филиповиќ, изјави дека Владата ќе направи се за да го заштити стандардот на граѓаните.
„Подземното складиште за гас во Околи ќе биде наполнето со 90 отсто, а денеска е на 48 отсто“, изјави Филиповиќ кој зборуваше и за планот на Европската комисија за намалување на потрошувачката на гас за 15 отсто.
„Детално го анализиравме планот и можеме да се вклопиме во мерките за штедење. Секогаш има различни мислења, се надевам дека утре ќе има компромис“, рече Филиповиќ, додавајќи дека тоа нема да влијае на економијата.
Тој најави и нов пакет мерки за помош на граѓаните кој Владата ќе го донесе на есен.
Владата во Загреб пред две недели ги замрзна цените на нафтените деривати.
.webp){kind=icon}
