ОКТА понуди нов попуст од два денари по литар за дизелот

Нафтената компанија ОКТА воведува привремен попуст од два денари за литар дизел гориво како одговор на најновите случувања на меѓународните пазари на горива. Мерката ќе важи од денеска, 20 октомври 2026, до 2 ноември 2026 г.

„Попустот ќе се применува на продажбата на дизел гориво што ОКТА го испорачува на трговците со горива на големо и мало. Учесниците на пазарот и понатаму самостојно ќе ги утврдуваат конечните малопродажни цени, во согласност со своите комерцијални политики и актуелните пазарни услови“, соопшти компанијата.

Од ноќеска на полноќ горивата во земјава имаат нови цени. Бензините поевтинија за 2,50 денари по литар, додека дизелот и екстра лесното масло за домаќинство се продаваат поскапо за два денари. Еуросупер 95 сега чини 96,00 денари за литар, а Еуросупер 98 се продава за 98,00 денари за литар. Еуродизелот чини  99,00 денари за литар.

Во новите цени што вчера ги утврди Регулаторната комисија за енергетика применета е владината одлука за намалена стапка на данокот на додадена вредност (ДДВ) од 10 отсто за дизелот и намалената акциза за четири денари по литар кај бензините и дизелот.

Премиерот Мицкоски вчера изјави дека  Владата засега успешно се справува со енергетските предизвици, дека за до крајот на годинава се обезбедени доволни количини за сите видови горива и дека не очекува поголеми проблеми ниту во текот на следната година.

„Продуктоводот што го поврзува солунското пристаниште со нашата рафинерија е под притисок и е наполнет, така што доволни количини на гориво ќе има за граѓаните. Ќе продолжиме со оваа политика за да го заштитиме стандардот на граѓаните колку што можеме“, истакна тој.

Денешната одлука на ОКТА за дополнителен попуст за дизелот премиерот ја најави вчера. Тој рече дека се при крај преговорите со компанијата за продолжување на мерката која од почетокот на војната на Блискиот исток важеше во три наврати.

„Оваа иницијатива е дел од серијата таргетирани мерки за поддршка кои ОКТА ги спроведува од март 2026 година, со цел да придонесе кон ублажување на влијанието на нестабилноста на меѓународните пазари и за поддршка на стабилноста и конкурентноста на домашниот пазар на горива. Со најновата иницијатива, вкупната вредност на досегашната поддршка, која ОКТА ја обезбедува за домашниот пазар од март 2026 година, се очекува да достигне приближно 8 милиони евра“, соопшти компанијата.