text size
Европската Унија (ЕУ) планира да помогне во финансирањето енергетски кабел што ќе ги поврзе Грузија и Азербејџан со земјите од ЕУ преку Црно Море. Претседателката на Европската комисија, Урсула фон дер Лајен, се сретна со лидерите од четирите вклучени земји на денешната церемонија за потпишување.
Вкупната вредност на проектот не е објавена. Плановите за далновод, прв што дирекно ќе ја поврзе ЕУ со регионот Кавказ, се дел од напорите на Унијата да ги диверзифицира изворите на енергија и да го задржи ограничувањето на цените.
„Од почетокот на руската војна сме одлучни да им свртиме грб на руските фосилни горива и да се диверзифицираме кон други енергетски партнери, и тоа функционира. Црноморскиот електричен кабел е нов преносен правец полн со можности, бидејќи истовремено може да помогне во пренос на електрична енергија до нашите соседи во Молдавија, Западен Балкан и, секако, Украина“, рече Фон дер Лајен во Букурешт.
Се очекува во септември следната година да се заврши деталната студија за изводливоста на проектот, а изградбата ќе трае шест години.
„Горди сме што сме дел од глобална единствена инвестиција, бидејќи кога постои стратегиски вакуум, важноста за иновациите расте. Да сум 30 години помлад, би рекол дека ова е навистина супер“, рече унгарскиот премиер Виктор Орбан.
Откако ќе се доврши, далноводот ќе го зголеми извозот на електрична енергија од Азербејџан во ЕУ, а земјата го проценува својот капацитет од обновливи извори на 27 гигавати. Нацијата станува сè поважна за европските земји во снабдувањето со енергија. Досега се склучени најмалку десет договори со Баку за поголем извоз на нивниот природен гас во обид да се намали зависноста од руските текови. „Следната година се планира дотокот на гас во ЕУ да се зголеми на 11,6 милијарди кубни метри“, информира претседателот на Азербејџан.
Министерството за економија на Грузија овој месец го рекламираше проектот за енергетски кабел, велејќи дека ќе се вклучи во изградбата на околу 1.195 километри подземни и подводни далноводи, кои може да пренесат дури еден гигават електрична енергија.
.webp){kind=icon}
