.webp){kind=icon}
„Брера Холдингс“ (Brera Holdings PLC) вчера потпиша писмо за намери за купување на македонскиот фудбалски клуб Академија Пандев, соопшти компанијата. Во сопштението се вели дека станува збор за европски прволигаш од Македонија, земја која има право на учество во трите големи натпреварувања на УЕФА.
„Ова е пример за тоа како „Брера Холдингс“ ја спроведува својата меѓународна стратегија за проширување и лиценцирање на брендот Брера ФК во Источна Европа“, рече извршниот директор на компанијата, Серџо Скалпели.
Тој додаде дека преку аквизицијата на Академија Пандев и преименувањето на клубот во Брера, компанијата има намера да ги подобри перформансите на тимот и да ги подготви играчите за професионалниот трансфер пазар, како и да освојува награди поврзани со правата за учество во УЕФА.
Прочитај повеќе
Пандев: Со „Брера“ ќе инвестираме милиони во повеќе клубови низ светот
„Брера холдингс“ вложува и во „Академија Пандев“, во јануари треба да купи 70 отсто од акциите.
30.11.2022
Од компанијата информираат дека во 2021 година Академија Пандев се пласираше во квалификациските натпревари на УЕФА, на кои имаше награди од 3 до 15 милиони долари.
Инаку, Горан Пандев, основач и сопственик на Академија Пандев, е независен член на Одборот на директори на „Брера Холдингс“. Во соопштението на компанијата се вели дека Пандев имал успешна кариера како фудбалер на Интер, како и дека во 2021 година станал првиот Македонец кој постигнал 100 гола во една од најдобрите пет. европски фудбалски лиги.
Од „Брера Холдингс“ додаваат дека во август 2022 година, подружницата на „Брера Холдингс“ – „Брера Милано“ склучила договор за спонзорство со Академија Пандев што и овозможило на компанијата да обезбеди консултантски и други услуги, притоа добивајќи видливост и комуникациско изложување во Македонија на брендот Брера ФК.
„Исклучително сме задоволни што ќе продолжиме да работиме со Горан Пандев и клубот што тој го основа во 2010 година, и да го донесеме наследството на брендот Брера ФК во Македонија“, изјави Алесандро Алеоти, главен директор за стратегија за „Брера Холдингс“ и основач на „Брера ФК“ во Милано пред повеќе од дваесет години.
„Ние веруваме дека овие клубови од највисоката дивизија во помалите земји имаат пониски оперативни трошоци и овозможуваат значителна заштеда на ресурси коишто се потребни за пристап до големите парични награди и инвестиции“, заклучи Алеоти.
Скалпели смета дека по купувањето на Академија Пандев ќе се олесни размената и трансфер пазарот на играчи од други клубови во Африка и Јужна Америка, особено во возрасната група од 18 до 21 година.
„Клубот исто така има право да учествува на големи младински турнири, како што е турнирот во Виареџо, на кој ќе има можност да се натпреварува против екипи од иста возрасна група од големи меѓународни клубови. Тоа претставуваат најдобра изложба за продажба на млади играчи и нуди голем потенцијален на трансфер пазарот.“, вели Скалпели.
Во соопштението на компанијата се додава дека иако правилата на Фудбалскиот сојуз на Северна Македонија ги ограничуваат странските играчи до осум во лигашките натпревари, неограничен број на странски играчите можат да бидат регистрирани да играат за секој тим.
Македонскиот фудбалски ас, Горан Пандев во ексклузивно интервју за „Блумберг Адрија“ во ноември, минатата година најави дека со „Брера Холдингс“ се планираат милионски инвестиции во повеќе клубови во светот откако компанијата излезе на американската берза Nasdaq.
„„Брера холдингс“ планира да собере од берзата повеќе од осум милиони евра и има проект да се купат повеќе клубови во светот. Нашата цел е да ја направиме „Брера холдингс“ позната по вложувањата во фудбалски клубови низ целиот свет и мислам дека сме на добар пат да го оствариме тоа, бидејќи зад овој проект стојат многу моќни луѓе. Планот за ребрендирање на Академија Пандев е најважниот дел од нивниот проект. Луѓето што се дел од Бордот на директори го гледаат мојот клуб како најголема афирмација во Европа и се надеваме дека од јануари Академија Пандев ќе ѝ продаде 70 проценти од своите акции на „Брера холдингс“ и клубот ќе зачекори по нов пат.“, изјави тогаш Пандев.
