Дали би го гледале анимираниот Новак Ѓоковиќ на Австралија опен?

Минатата недела започна еден од четирите најголеми тениски гранслем-турнири во светот - Австралија опен, на кој настапува и прочуениот српски ас Новак Ѓоковиќ, кого од неодамна го тренира неговиот врсник и поранешен ривал Енди Мареј.

Лани Австралија опен реши да ги помести границите во пристапот кон публиката, па покрај искуството во живо (не на самиот терен), да понуди и анимирана верзија на често тензичните мечеви меѓу врвните тенисери, која во реално време ја следи фактичката состојба на натпреварот.

Во тој формат тениските топчиња се невообичаено големи, главите на играчите не се пропорционални, а понекогаш се чини дека рекетите што ги држат ќе „одлетаат“, но резултатите се реални и точни. Овој практично цртан филм на Австралија опен е бесплатна верзија на акцијата што се одвива во живо во Мелбурн.

Да објасниме подетално - на официјалниот канал на Австралија опен на Јутјуб (YouTube) може да ги следите натпреварите „во живо“, според тоа што моментално се игра, ама гледајќи анимирани играчи на виртуелен терен.

Видеото е придружено со вистински коментар на натпреварот, изведен од човечки глас, додека анимацијата го отсликува тоа што се случува на теренот. Работите одат дотаму што вклучуваат сцени на кршење рекети, како и надигрувања - серија непрекинати удари меѓу играчите во текот на еден поен. Многумина би рекле дека надигрувањето е всушност срцевината на играта, тоа што му дава динамика и возбуда на мечот, па анимираната верзија на тениски натпревар сигурно ќе го задржи вниманието на гледачите.

Од компанијата „Тенис Австралија“ (Tennis Australia) за „Би-би-си спорт“ (BBC Sport) изјавија дека со оваа анимирана верзија сакаат да ја воодушеват новата генерација љубители на тенисот, правејќи го спортот попристапен и поинтересен, особено кога станува збор за децата и семејствата. Достапноста на анимираниот формат им дава можност на луѓето да ги гледаат натпреварите „во живо“, дури и ако немаат разни ТВ-претплати.

Во Обединетото Кралство, на пример, турнирот Австралија опен го емитува „Евроспорт“ (Eurosport), за што е потребна претплата. Со бесплатниот стриминг на Јутјуб овие пречки повеќе не постојат, а освен тоа обраќањето до помладата публика, која е повеќе поврзана со интернет и онлајн канали отколку со телевизијата, како традиционален медиум, е подиректно.

Покрај тенисот и Австралија опен како пионери во развојот на оваа нова технологија, другите спортови исто така почнаа да ги истражуваат досегот и потенцијалот на мрежното поврзување на спортовите во живо и виртуелниот свет. Во декември 2024 година Националната фудбалска лига (НФЛ) на Северна Америка соработуваше со платформите „Дизни+“ (Disney+) и „ЕСПН+“ (ESPN+) за да прикажува анимирана игра во реално време со Синсинати бенгалс (Cincinnati Bengals) и Далас каубојс (Dallas Cowboys). Играчи беа ликовите од „Симпсонови“, а играта беше креирана со помош на технологијата Хок ај (Hawk-Eye).

Покрај НФЛ и Австралија опен, лансирана е слична верзија и на Националната хокеарска лига (НХЛ) на Северна Америка, во која се појавуваат ликови од анимирана комедија на „Дизни“.