Ворен Бафет и натаму верува во фосилните горива

Инвестициите на Ворен Бафет од повеќе милијарди долари во нафта и гас од почетокот на пандемијата се исплатеа кога секторот забележа рекорден профит во 2022 година. Но, наместо да ги распродаде за огромни профити оваа година, „пророкот од Омаха“ сака повеќе.

„Беркшир Хатавеј“ (Berkshire Hathaway Inc.) го користи овогодинешниот пад на цените на суровините за да ги поттикне некои од омилените инвестиции на Бафет во нафта и гас, покажувајќи дека најпознатиот инвеститор во историјата гледа можност во секторот кој долго време е во немилост поради неговата нестабилност и влијание врз климата.

Претходно овој месец, „Беркшир“ се согласи да потроши 3,3 милијарди долари за да го зголеми својот удел во терминалот за извоз на течен природен гас во Мериленд. Оваа година исто така го зголеми својот удел во „Оксидентал петролеум“ (Occidental Petroleum Corp.) за 15 отсто и купи дополнителни акции во пет јапонски трговци со суровини. Во меѓувреме, енергетскиот оддел на „Беркшир“ силно лобира за предлог закон со кој Тексас ќе потроши најмалку 10 милијарди долари на постројки за природен гас за да ја поддржи својата мрежа.

Од една страна, тоа е класичен лов на зделки од Бафет и потпретседателот на „Беркшир“, Чарли Мангер. Тековната загриженост за еколошките, социјалните и управувачките перформанси на секторот, слабите приходи пред пандемијата и ризикот од пад на побарувачката за фосилни горива во децениите што следат, одвратија многу инвеститори од индустријата. Акциите од енергетскиот сектор се тргуваат со најниска очекувана стапка на принос од кој било друг сектор во индексот S&P 500, покажуваат податоците собрани од „Блумберг“. Енергетскиот сектор, сепак, генерира најголем готовински тек по акција.

„Луѓето не ги гледаат економските податоци што ги гледаат Бафет и Мангер“, вели Кол Смед, извршен директор на „Смед капитал менаџмент“ (Smead Capital Management), кој управува со имот од 5,4 милијарди долари, вклучувајќи ги и акциите на „Беркшир“ и „Оксидентал“. „Повратот на капиталот во јаглен нафта и гас е навистина голем во споредба со другите сектори. А со ЕСГ (ESG), можете да ги купите поевтино“.

Нијанси на обложување

Но, облогот на Бафет за фосилните горива не е без нијанси. Додека „Беркшир“ останува трет по големина акционер на „Шеврон“ (Chevron Corp), го намали својот удел за околу 21 отсто во првиот квартал. „Оксидентал“, „Коув поинт“ (Cove Point LNG) и јапонските трговски гиганти имаат уникатни средства кои ќе играат клучна улога во напојувањето на светот, без оглед по кој пат ќе оди енергетската транзиција, ако воопшто тргне.

Дури и навидум едноставните нафтени инвестиции на „Беркшир“ имаат нијанси. Земете го „Оксидентал“. Бафет инвестираше 10 милијарди долари за да му помогне на „Оксидентал“ да го победи „Шеврон“ во понудата за „Анадарко петролеум“ (Anadarko Petroleum Corp.) во 2019 година, а компанијата сега поседува површина со големина на Јамајка во најголемото и најевтиното нафтено поле на шкрилци во светот.

На овогодинешниот годишен состанок Бафет нагласи дека шкрилците се разликуваат од конвенционалните извори на сурова нафта во Русија и на Блискиот Исток. Бунарите од шкрилци, од кои доаѓа најголемиот дел од американското производство, можат брзо да се стартуваат и имаат краток век, што ги прави операторите пофлексибилни во одговорот на побарувачката и цените на нафтата.

„Во САД, ние сме среќни што имаме способност да произведуваме нафта што ја добиваме од шкрилци, но тоа не е долгорочен извор како што може да помислите од гледањето филмови“, рече тој, нарекувајќи ја „нафта со краток век“.

Bloomberg Mercury

Бафет, исто така, рече дека „двете крајности“ во дебатата за климата станале „смешни“ со нивните аргументи.

„Ќе донесеме рационални одлуки“, рече тој. „Не мислиме дека е неамерикански да се произведува нафта“.

„Коув поинт“ дава уште еден пример за нијансирана енергетска игра. Терминалот купува гас од блиското поле на шкрилци Марселус и го лади во течност пред да го испрати низ светот. Исто така, има ретка способност за увоз на гас, нешто што ривалските постројки во брегот на Заливот не можат да го направат. Глобалната побарувачка за ЛНГ значително порасна во последниве години бидејќи Европа го замени рускиот гас, Азија го користи за да генерира повеќе енергија за своите растечки економии, а земјите бараат почисти алтернативи за јагленот.

Но, „Коув поинт“ има и неколку уникатни предности. За разлика од неколкуте проекти од повеќе милијарди долари долж брегот на Мексиканскиот Залив кои беа прекинати по руската инвазија на Украина, „Коув поинт“ е добро развиен, бидејќи се користи од 2018 година. Се наоѓа во Мериленд на источниот брег каде што законите отежнуваат изградба на ривалски објекти, намалувајќи ја конкуренцијата. Што е најважно, проектот е поддржан со долгорочни договори со клиенти, вклучително и „Токио гас“ (Tokyo Gas Co.) и „Сумитомо“ (Sumitomo Corp). „Беркшир“ е вториот најголем акционер на „Сумитомо“, по пензискиот фонд на јапонската влада.

Покрај акциите на Бафет, „Беркшир Хатавеј енерџи“, кој поседува комунални претпријатија, електрани и далноводи, има силни перформанси. Заработката во дивизијата, надгледувана од назначениот наследник на Бафет, Грег Абел, достигна рекордни 3,9 милијарди долари во 2022 година, речиси двојно зголемена во период од пет години. „Беркшир“ треба да ги пријави резултатите од вториот квартал на 5 август.

Тоа е јасен знак дека светската жед за енергија, како за фосилни горива, така и за обновливи, е ненаситна, дури и кога климатската криза се забрзува. И температурите и побарувачката за нафта достигнуваат рекордно ниво оваа година и најверојатно ќе продолжат да растат до крајот на деценијата. Грижата за животната средина можеби ги натера другите да се оддалечат од енергијата, но исто така тоа може да ја остави вратата отворена за Бафет да профитира, рече Смед.

„Сакам ЕСГ“ затоа што помага да се задржат резервите на нафта и гас евтини, рече Смед. „Сигурен сум дека Бафет и Мангер исто така сакаат ЕСГ“.

Во моментов нема коментари за веста. Биди прв да коментира...

Остави коментар