Хеџ-фонд во Кина повикува клиентите да повлечат готовина поради ризикот од Трамп

Еден од најголемите хеџ-фондови во Кина советуваше некои од клиентите да ги повлечат своите добивки поради зголемените ризици за кинеската економија и пазари по враќањето на Доналд Трамп во Белата куќа.

Шангајската компанија „Персевиранс“ (Perseverance Asset Management), која управува со повеќе од 100 милијарди јуани (14 милијарди долари), предложи инвеститорите во неколку различни продукти под управување од нејзиниот водечки менаџер на фондови Денг Сјаофенг да размислат за повлекување, според известување испратено до дистрибутерите, во кое „Блумберг“ (Bloomberg) имал увид. Во известувањето се наведуваат позитивните приноси досега и потенцијалните ризици по резултатите од изборите во САД.

Се очекува зголемен притисок врз кинескиот извоз, што, заедно со флуктуациите на девизниот курс, ќе резултира со „комплексна средина“ и поголема неизвесност во иднина, се наведува во известувањето на компанијата. Инвеститорите би можеле да размислат за приспособување на својата распределба на средства, при што се посочува дека прозорецот за повлекување ќе се затвори на 13 ноември.

Кинеските акции силно закрепнаа од септември, откако официјалните лица објавија моќен пакет стимулативни мерки за поддршка на економијата. Тоа беше пред победата на Трамп неделава, што донесе потенцијални  неповолни настани како обновување на трговската војна.

УБС (UBS Group AG) во четвртокот изјави дека победата на Трамп претставува предизвик за кинескиот пазар на акции, но остана неутрална за средствата поради релативно ниските процени. Пазарот исто така внимателно ќе следи дали владата ќе преземе проактивни чекори за зголемување на политичките стимулативни мерки, додаде УБС.

Трамп вети дека ќе воведе тарифи од 60 отсто на увозот од Кина, потег што се очекува да додаде притисок врз растот, кој економистите велат дека може да се бори да ја достигне официјалната цел од околу 5 отсто.

„Преземањето на кормилото од страна на Трамп ќе претставува посилен удар врз апетитот за ризик на инвеститорите на кинеските пазари доколку тој ги исполни ветувањата за тарифите“, напишаа во понеделникот аналитичарите на „Цитик“ (Citic Securities Co.), предводени од главниот економист Минг Минг.

Референтниот индекс CSI 300 порасна за околу 30 отсто од средината на септември, кога достигна најниско ниво во повеќе од пет години. Индексот скокна за 3 отсто во четвртокот, пред да ги намали добивките во петокот, додека инвеститорите чекаа повеќе податоци околу понатамошните стимулативни мерки од клучниот состанок на законодавниот орган.

„Персевиранс“ посочи дека известувањето е редовно потсетување за датумите кога повлекувањата се отворени за клиентите месечно и не треба да се толкува претерано. Компанијата останува „оптимист“ за пазарните перспективи додека внимателно ги следи, се наведува во одговорот до „Блумберг“. 

Тригодишното заклучување на релевантните производи штотуку истече, а некои клиенти со помал апетит за ризик претходно изразија намери да ги повлечат добивките откако нето-вредноста на средствата достигна нови височини годинава, според одговорот. Известувањето било испратено само до инвеститорите во некои производи управувани од Денг и не е поврзано со другите менаџери на фондови.

Инаку, повиците за повлекување на клиентите се ретки меѓу кинеските менаџери на фондови бидејќи тие би довеле до одливи од производите и намалување на средствата под управување.

Во моментов нема коментари за веста. Биди прв да коментира...

Остави коментар