Шефот на ИБМ (IBM), Арвинд Кришна, има порака до 260.000 вработени во компанијата (International Business Machines Corp): „Работата од далечина може да биде опасна за вашата кариера“.
Извршниот директор на ИБМ, чиј бизнис со компјутерски хибридни облаци има корист од подемот на работата од далечина, рече дека сè уште не принудува ниту еден вработен да оди во канцеларија, но на тие што не го прават тоа ќе им биде тешко да достигнат унапредување, особено во менаџерските улоги.
„Да се биде менаџер на луѓе кога сте оддалечени е едноставно тешко, затоа што ако управувате со луѓе, треба да можете да ги гледате одвреме-навреме. Не мора да бидете присутен секоја минута. Не треба да функционирате според оние стари правила 'сите се пред моите очи', но барем понекогаш“, рече тој во интервју во понеделникот во Њујорк.
Коментарите на Кришна дополнително ја подгреаја и онака големата дебата за предностите на работата од далечина наспроти физичкото присуство, при што некои извршни директори тврдат дека работниците, особено помладиот персонал, мора почесто да бидат присутни заради учење и можности за менторство, додека други експерти укажуваат на истражувања што покажуваат дека работниците се посреќни и уште попродуктивни кога имаат можност да работат оддома.
Сепак, персоналот што е присутен во канцелариите поминува 25 проценти повеќе време во активности за развој на кариерата отколку нивните колеги што работат од далечина, покажуваат податоците од економистите што ги следат трендовите на работа оддома.
„Ми се чини дека работиме подобро кога сме заедно и лично присутни“, рече Кришна, кој ја опиша политиката на компанијата за враќање во канцеларија како „ве охрабруваме да дојдете, очекуваме да дојдете, сакаме да учите“.
Арвинд Кришна, извршен директор на ИБМ
Bloomberg Mercury
„Три дена во неделата е бројката што поттикнува“, рече тој. Меѓу вработените во САД што можат да работат оддома, речиси половина се хибридно ангажирани, според податоците од тим економисти што ја следеле темата од почетокот на пандемијата. Само еден од пет работници е целосно оддалечен, а преостанатите се во канцеларија со полно работно време.
Податоците покажуваат дека работата оддома е најчеста во секторите на технологија и професионални услуги во кои се натпреварува ИБМ. Но со зголемувањето на отказите и намалувањето на отворените работни места, некои работници се загрижени дека работата оддома може да влијае на нивната сигурност за работното место. Иако околу 80 проценти од вработените во ИБМ барем дел од времето работат оддома, Кришна рече дека далечинските ангажмани се најпогодни за специфични улоги на „индивидуални соработници“, како што се услугите за клиенти или софтверски програмери.
„На краток рок веројатно може да бидете еднакво продуктивни, но вашата кариера страда. Преместувањето од актуелната на друга работна позиција изгледа е помалку веројатно затоа што никој не ги набљудува тие работници во друг контекст. Ќе биде потешко. Не е невозможно, но веројатно многу потешко“, рече тој.
Кришна, кој стана извршен директор на компанијата веднаш по избувнувањето на пандемијата, во април 2020 година, рече дека луѓето избираат да работат од далечина, но тоа не мора да биде траен избор, туку избор заснован на практичноста или околностите. Според него, работниците од далечина не учат како да прават некои работи, како да се справат со тежок клиент или како да прават компромиси кога дизајнираат нов производ.
„Не разбирам како да го направам сето тоа од далечина“, рече тој.
Извршниот директор на ИБМ работеше на преориентирање на стогодишната компанија околу попрофитабилни услуги како хибрид-облаци, каде што клиентите имаат свои компјутерски центри за податоци во некоја комбинација со јавни облаци, како што се „Амазон“ (Amazon.com Inc.) и „Мајкрософт“ (Microsoft Corp).
Компанијата најави откази во некои сектори на почетокот на оваа година, кои може да засегнат околу 5.000 работници откако целосно ќе заврши процесот на реструктурирање. Сепак, Кришна рече дека ИБМ на глобално ниво ја зголеми својата работна, со што во првиот квартал имало околу 7.000 нови вработени.
.webp){kind=icon}
