Сега е вистинско време да побарате покачување на платата

Сега е вистинско време да побарате покачување на платата.

Пазарот на трудот е исклучително тесен, но стравувањата од рецесија растат, што го прави добар момент за вработените да преговараат за подобри плати, бонуси и бенефиции пред да биде предоцна, велат експертите.

Отворените работни позиции се на највисоко ниво, а стапката на невработеност е блиску до најниското ниво во последните 50 години, што значи дека вработените сè уште имаат многу моќ, особено затоа што високата инфлација ги јаде нивните приходи. Сепак, отпуштањата стануваат сè почести во индустриите, вклучително и секторите технологија, криптовалути и недвижности, како што Федералните резерви во САД ги зголемуваат каматните стапки, пазарите опаѓаат и има заладување на пазарот на станови.

„Сега е пазар на оние кои бараат работа, така што е добро време да побарате поволности пред компаниите да станат поконзервативни“, вели Лорен Томас, економист на страницата за барање работа „Гласдор“ (Glassdoor).

Ова се некои од врвните совети од тренерите за кариера и финансиските експерти за тоа како да побарате поволности.

Знајте ја својата вредност

Најважниот совет е да ја знаете вашата вредност.

Да можете да ги оцените вашите вештини и позитивните резултати што сте ги донеле за компанијата е најдобриот начин да го добиете она што го сакате, вели работниот консултант, Лорен Риклин. Таа предлага да доставите детални квантитативни и квалитативни докази за вашите перформанси во последните шест до 12 месеци за да ги поткрепите вашите тврдења.

„Водете досие за вашата продуктивност и дојдете на преговори подготвени“, советува таа.

Претстојните анализи на перформансите се добро време за ваков разговор, бидејќи работодавците очекуваат да се разговара за резултатите и барањата. „Најлошото нешто што може да се случи е да кажат не“, нагласува Риклин.

Bloomberg

Разберете ја пошироката слика

Инфлацијата или потенцијалната рецесија не треба да бидат одлучувачки фактор кога работникот бара покачување или поволности. Барањето покачување од 9 отсто, бидејќи инфлацијата достигна 9 отсто, веројатно нема да биде ефективно. Сепак, свесноста за тоа како напредуваат пошироката економија, вашиот сектор и вашата компанија може драматично да ги подобри вашите шанси да го добиете она што го сакате, посочува Риклин.

Истражувањето за слободни работни места во вашата индустрија, побарувачката за вашиот сет на вештини, поволностите што ги нудат другите компании во вашата индустрија, како и дали вашиот работодавец се проширува или почнува да се намалува, би можеле да бидат клучни за да откриете што да побарате.

„Треба да разберете што е разумно на пазарот и колку е реално вашето барање“, смета таа.

Прашајте порано 

Да побараш повеќе пари сега е секогаш подобро отколку да побараш подоцна, вели Томас од „Гласдор“. Дури и ако сте побарале покачување претходната година, најдобро е да не чекате. Ако вашиот работодавец каже да, ќе уживате во покачувањето порано и ако прашате сега ќе го намалите ризикот натамошен економски пад да го анулура вашето барање.

Исто така, тешко е да се намалат платите или бенефициите откако ќе бидат дадени.

„Можно е работодавецот да ги одземе поволностите, но тоа е навистина тешко да се направи бидејќи обично е многу непопуларно“, додава Томас.

Имајте план

Ако сакате да побарате дополнително време за одмор или отсуство, од помош е да имате план за покривање, вели тренерот за кариера Алис Стејплтон. Предлагањето кој би можел да ги преземе вашите смени кога сте отсутни или помагањето на вашиот работодавец со привремено регрутирање, ја зголемува веројатноста вашиот менаџер да каже „да“.

„Од деталите за тоа колку мало влијание би имало посакуваното подобрување на поволностите врз тимот може да зависи дали вашето барање ќе биде одобрено“, посочува таа.

Избегнувајте ултиматуми

Пристапот „земи или остави“ кон преговорите честопати не успева, вели тренерот за кариера, Хана Салтон. Обидете се да избегнете избрзани реакции во жештината на моментот. Наместо тоа, заблагодарете му се на вашиот менаџер и побарајте време да ја разгледате понудата, за да оставите простор вашата глава да се олади.

„Не сакате вашиот работодавец да се затвори. Сакате да го продолжите разговорот“, објаснува таа.