text size
Извршниот директор на „Епл“ (Apple), Тим Кук, во текот на годинава ќе му препушти столчето на својот наследник, досегашниот шеф на одделението за хардвер на компанијата Џон Тернус. Со тоа се завршува 15-годишниот мандат на Кук на чело на „Епл“, во кој ја доведе компанијата до вреднување од четири билиони долари.
Тернус ќе стане извршен директор на 1 септември, кога Кук ќе премине на позицијата извршен претседател, соопштија од компанијата во понеделникот. Тернус (50) е раководител на хардверско инженерство од 2021 година и поминал 25 години фокусиран на развој на производи кај производителот на „ајфон“. „Блумберг њуз“ претходно извести дека Тернус е очигледен наследник на Кук.
Одделението за хардверско инженерство ќе го преземе долгогодишниот заменик Том Мариб, според извори запознаени со ова прашање. Тој ќе му одговара на новоименуваниот главен директор за хардвер Џони Сруџи. Во таа улога, Сруџи добива надзор над неодамна споената група за хардверско инженерство и хардверски технологии.
Тернус сега мора да постави нов пат за едно од најпознатите претпријатија во Силициумската Долина во значаен момент. Иако растот на „Епл“ останува силен, фирмата се мачи во трката за вештачка интелигенција - технологија што ветува дека ќе го трансформира начинот на кој луѓето ги користат уредите.
„Џон Тернус има ум на инженер, душа на иноватор и срце да води со интегритет и чест. Тој е визионер чии придонеси за ‘Епл’ во текот на 25 години се веќе премногу големи за да се набројат и без сомнение е вистинската личност што ќе го води ‘Епл’ во иднината“, порача Кук.
Објавата доаѓа само неколку недели по прославата на 50-годишнината на компанијата - свеченост што вклучуваше настап на Пол Макартни во живо на кампусот Епл Парк. Долгогодишен директор на „Епл“, кој работел и под Кук и под Тернус, рече дека „било очигледно оти прославата наедно е и збогување со Тим“.
Тернус е во стилот на Тим Помладиот и веројатно ќе „продолжи да ја води приказната онака како што тоа го правеше Тим“, рече директорот, кој побара да остане анонимен. Тернус не е шоумен како Стив Џобс, рече тој. „Не е маркетиншки ас. Но е човек за производи, кој исто така е политички паметен.“
Како и Кук, Тернус „веројатно не е тип што ќе ризикува сè“, истакнува изворот на „Блумберг“.
Инвеститорите во голема мера мирно ја прифатија објавата. Откако паднаа за речиси два отсто во доцното тргување, акциите ги намалија своите загуби. До понеделникот вечер во Њујорк тие паднаа за помалку од 0,5 отсто, на 271,7 долари.
Глобален амбасадор
Во новата улога на извршен претседател, Кук ќе соработува со креаторите на политиките низ светот, соопштија од „Епл“. Шеесетгодишниот извршен директор веќе го надгледува односот на „Епл“ со американскиот претседател Доналд Трамп и често патува во Кина за да управува со врските на компанијата со таа земја. Како дел од транзицијата, долгогодишниот претседател Арт Левинсон ќе стане водечки независен директор.
Кога ќе се повлече од позицијата извршен директор, Кук зад себе ќе има рекордни 15 години поминати на таа функција. Во текот на тој период помогна во градењето на успехот на уредите „мек“ и „ајфон“, пробивајќи се во секторот на здравствени услуги, паметни часовници и слушалки. Годишната продажба се зголеми за речиси четири пати, на 416 милијарди долари, во последната фискална година, а „Епл“ сега има активна инсталирана база од повеќе од 2,5 милијарди уреди.
За време на ерата на Кук, компанијата претстави поголеми „ајфони“, неколку нови „ајпади“ и услуги како Епл мјузик и Епл ТВ. Но имаше и промашувања, вклучувајќи ги хедсетот „вижн про“ и неуспешниот обид за изработка на автономен автомобил. Фирмата со седиште во Купертино, Калифорнија, помина децении работејќи на двете.
Мандатот на Кук исто така беше обележан со пропусти во вештачката интелигенција. „Опен еј-ај“, „Антропик“, „Гугл“ и други лансираа производи со вештачка интелигенција што го менуваат светот, додека „Епл“ главно стоеше настрана.
Нови уреди
Тернус силно верува во вештачката интелигенција и овој месец го реорганизира одделението за хардверско инженерство за да работи со нова платформа за вештачка интелигенција, осмислена да помогне во развојот на производи и подобрување на квалитетот на уредите, според луѓе запознаени со ова прашање.
Идниот извршен директор го предводеше развојот на три нови носливи уреди насочени кон вештачка интелигенција и нови домашни уреди, извести „Блумберг“. Таа линија вклучува нови слушалки „ерподс“, паметни очила и приврзок со камери. Исто така го надгледуваше развојот на нови паметни производи за домаќинството, вклучувајќи екран со препознавање лице, стоечки робот и безбедносна камера.
Тим Кук
Bloomberg
Кук со месеци го подготвуваше Тернус за таа улога, а кон крајот на минатата година го замоли неформално да го преземе водењето на тимовите за дизајн на софтвер и хардвер во компанијата. Исто така, во последните месеци го наследи новиот тим за изработка на прототипи на хардвер и ја презеде одговорноста за хардверското инженерство за „епл воч“.
Во допис до групата за хардверско инженерство, Тернус рече дека в понеделник се повлекува од својата тековна позиција. Сепак, не оди далеку, рече Тернус. „Се радувам на блиската соработка со вас во мојата нова улога. Непотребно е да се каже дека и понатаму планирам да бидам многу активен.“
Заминувањето на Кук од позицијата извршен директор придонесува за голема флуктуација во раководството на компанијата - во последните месеци од своите позиции си заминаа и водачот на секторот за заштита на животната средина Лиса Џексон, шефот на операции Џеф Вилијамс, поранешниот шеф на хардвер Ден Ричио и долгогодишниот раководител за дизајн на интерфејс Алан Дај. Исто така дојде до промени во улогите на главниот правен советник и финансискиот директор на компанијата.
„Денес имаме навистина извонреден план за иднината и никогаш не сум бил пооптимистичен во поглед на иднината на ‘Епл’. Затоа одлучив дека сега е вистинското време за премин кон нова улога на извршен претседател“, им порача Кук на вработените, додавајќи дека повеќе детали за транзицијата ќе сподели на состанокот во вторник.
.webp){kind=icon}
