„Луфтханза“ ќе откаже 20.000 летни летови поради скапото гориво

Авиокомпанијата „Луфтханза“ (Deutsche Lufthansa AG) ќе укине 20.000 неисплатливи кратки лета од европската летна програма за да заштеди гориво, чија цена се удвои од почетокот на војната со Иран.

Кратењата ќе изнесуваат околу еден отсто од расположливиот сооднос седиште-километри и ќе заштедат приближно 40.000 тони авионско гориво, соопшти најголемата европска авиогрупа. Потегот доаѓа откако превозникот минатата недела објави затворање на регионалната единица „Ситилајн“ (Cityline) и приземјување на 27 постари авиони што трошат многу гориво.

„Луфтханза“ презеде некои од најдрастичните мерки меѓу глобалните авиокомпании од почетокот на конфликтот, додека истовремено се соочува и со штрајкови од пилотите и кабинскиот екипаж.

Првите 120 откажувања беа спроведени во вторникот, со важност до крајот на мај. Пошироките намалувања до крајот на летната сезона ќе бидат објавени до крајот на април или почетокот на мај.

Глобално, капацитетот во индустријата за мај е намален за околу 3 процентни поени, при што речиси сите од 20-те најголеми авиокомпании ги намалуваат летовите, според податоците на „Сириум“ (Cirium Ltd.). Компанијата ја ревидира претходната прогноза за раст од 4 до 6 отсто за годината и наведува дека е можен пад до 3 отсто под одредени услови.

„Луфтханза“ се обидува да ја зголеми профитабилноста со план за намалување на 4.000 административни работни места до 2030 година и пренасочување на повеќе кратки летови кон поевтини единици како „Сити ерлајнс“ (City Airlines) и „Дискавер“ (Discover), каде што трошоците за екипаж се до 40 отсто пониски отколку кај главната авиокомпанија.