„Тесла“ вложува над 25 милијарди долари во ВИ и роботи

„Тесла“ (Tesla Inc.) очекува дополнителни трошоци од неколку милијарди долари оваа година за да ги поддржи амбициите на Илон Маск за трансформација на компанијата од производител на електрични возила во компанија за вештачка интелигенција (ВИ) и роботика.

Капиталните инвестиции оваа година ќе надминат 25 милијарди долари, соопшти компанијата во средата, што е околу трипати повеќе од минатата година. Планираните вложувања се зголемени во однос на претходната проекција од околу 20 милијарди долари.

„Треба да се очекува значително зголемување на капиталните расходи“, рече Маск на конференциски повик по објавувањето на резултатите за првиот квартал. Инвестициите ќе бидат насочени кон големо проширување на фабричките операции, вклучувајќи производство на хуманоидниот робот „оптимус“ (Optimus), иницијативи во областа на вештачката интелигенција и автономното возило „сејберкеб“ (Cybercab).

Традиционалниот автомобилски бизнис на „Тесла“ бележи пад веќе две години, што дополнително го зголемува притисокот врз планираниот пресврт кон овие футуристички проекти. Ревидираниот план за трошење ја покажува високата цена што „Тесла“ мора да ја плати за да ги оствари своите цели, изјави Дек Маларки, директор во СЛЦ (SLC Management). Тоа ќе „ги олади процените за потенцијалот на слободниот готовински тек оваа година“, додаде тој.

Акциите на „Тесла“ во доцното тргување останаа речиси непроменети, бришејќи го претходниот раст по објавата на повисоките процени за трошоците. До затворањето во средата, акцијата падна околу 21 отсто во однос на рекордното ниво во средината на декември.

Сепак, во првиот квартал приспособената добивка порасна на 41 цент по акција, со што „Тесла“ ги надмина просечните очекувања на аналитичарите од 34 центи, според податоците на „Блумберг“. Ова е втор последователен квартал со подобри резултати од очекуваните.

Извештајот вклучува и охрабрувачки сигнали за основниот автомобилски бизнис. „Тесла“ наведува дека забележала „континуиран раст на побарувачката за возила“ во делови од Азија и Јужна Америка, со закрепнување во Северна Америка и регионот Европа–Блискиот Исток. Овие изненадувачки оптимистички коментари доаѓаат неколку недели по продажбите на почетокот на годината, кои беа послаби од очекуваните.

Илон Маск Bloomberg

Првиот квартал беше втор најлош по испораки од средината на 2022 година, а полош беше само истиот период една година претходно, кога „Тесла“ го паузираше производството на „модел уај“ (Model Y) и се соочи со негативни реакции поради политичката ангажираност на Маск.

Извештајот „потврдува дека, иако традиционалниот бизнис со возила повеќе не расте брзо, тој е доволно стабилен за да ги финансира големите инвестиции на ‘Тесла’ во роботика и автономно возење“, наведе аналитичарот Ендрју Роко од ЗИР (Zacks Investment Research).

„‘Тесла’ истакна дека растот на цените на горивата оди во прилог на нејзиниот бизнис, поттикнувајќи интерес кај купувачите. „Видовме благ раст на испораките од квартал во квартал кога станува збор за заостанати нарачки“, рече финансискиот директор Ваибхав Танeја.

Како што наведе Маск, компанијата ќе го зголемува производството на возила во рамките на планот за капитални инвестиции. „Ги поставуваме темелите за она што очекуваме да биде значителен раст на производството на возила во иднина“, рече извршниот директор.

Сепак, во првите три месеци од 2026 година „Тесла“ потроши помалку од 2,5 милијарди долари - значително под просечното квартално ниво потребно за да се постигне годишната проекција. Тоа придонесе компанијата да забележи позитивен слободен готовински тек од 1,4 милијарда долари, што е подобро од очекувањата на аналитичарите, кои предвидуваа негативен тек од речиси 1,9 милијарда.

„Тесла“ и понатаму очекува раст на инсталациите во енергетскиот сегмент оваа година. Компанијата повтори и планови за проширување на услугата „роботакси“ (Robotaxi), која треба да се прошири во повеќе американски градови.

Иако не се објавени детали за големината на флотата, ширењето оди бавно, а значајни приходи се очекуваат дури подоцна. „Тесла“ исто така развива услуги за споделување возење во областа на Сан Франциско.

Компанијата останува на пат да започне производство на клучни производи, меѓу кои „сајберкеб“, камионот „семи“ (Semi) и подобрена верзија на системот за складирање „мегапек“ (Megapack).