„Дизни“ со раст на добивката од филмовите и парковите во првиот квартал на новиот директор

„Дизни“ (Disney) објави подобри резултати од очекувањата на Волстрит благодарение на подобрената профитабилност на стриминг-бизнисот, новите филмови „Аватар“ и „Зоотопија“, како и поголемата потрошувачка на посетителите во ресортите и на крузерите на компанијата.

Заработката по акција, без одредени ставки, се зголемила на 1,57 долар во вториот фискален квартал, што е над просечната прогноза на аналитичарите од 1,51 долар, според податоците собрани од „Блумберг“ (Bloomberg). Приходите изнесувале 24,9 милијарди долари, што е раст од 7 отсто во однос на истиот период лани и исто така над очекувањата на Волстрит.

Оперативната добивка во сите три сектори на „Дизни“ - забава, искуства и спорт - ги надминала очекувањата на аналитичарите. Резултатите ја нагласуваат стабилноста на бизнисот на компанијата во новата ера под водство на главниот извршен директор Џош Д’Амаро, кој во март го наследи Боб Ајгер.

„Дизни“ соопшти дека очекува заработката по акција да порасне за 12 отсто во текот на оваа фискална година.

„Креативниот и оперативниот замав донесе силни квартални резултати“, наведоа Д’Амаро и финансискиот директор Хју Џонстон во писмото до акционерите во средата, додавајќи дека „и натаму очекуваат растот да се забрза во втората половина од фискалната година“.

Акциите пораснаа за околу 8 отсто во претпазарното тргување во Њујорк. Тие беа во пад од 12 отсто од почетокот на годинава до затворањето на тргувањето во вторникот, во споредба со раст од 6 отсто на индексот S&P 500.

Директната потрошувачка дивизија на „Дизни“, која ја вклучува стриминг-услугата Дизни+ и е предводена од Џо Ерли и Адам Смит, првпат достигна двоцифрена профитна маржа, исполнувајќи една од долгогодишните амбиции на компанијата по неколку години загуби по лансирањето на платформата.

Оперативната добивка во спортскиот сектор на компанијата паднала за 5 отсто поради пониските приходи од рекламирање на ЕСПН (ESPN) и повисоките трошоци за програмски права. Во тековниот квартал „Дизни“ очекува оперативната добивка да се намали за 14 отсто поради повисоките трошоци за правата за емитување.

Посетителите трошеле повеќе пари во тематските паркови на „Дизни“ во Калифорнија и Флорида, што помогнало да се ублажи падот од 1 отсто на посетеноста поради помалиот број странски туристи. Продадени биле и повеќе крстосувања благодарение на пуштањето во употреба на нови бродови во ноември и март.

Побарувачката во домашните паркови и ресорти е стабилна, соопшти компанијата во писмото, иако е „свесна за макроекономската неизвесност со која денес се соочуваат потрошувачите“.

Овие резултати претставуваат прва победа за Д’Амаро по не баш најдобриот почеток. Федералната комисија за комуникации побара предвремена ревизија на телевизиските станици „Еј-би-си“ во сопственост и управување на „Дизни“; „Опен еј-ај“ (OpenAI Inc.) го укина видеогенераторот Сора, со што пропадна договор вреден една милијарда долари со „Дизни“; а „Епик гејмс“ (Epic Games Inc.) - кој развива виртуелен универзум базиран на интелектуалната сопственост на „Дизни“ - најави отпуштања и забавување на побарувачката за Фортнајт (Fortnite).

Долгорочната стратегија на Д’Амаро вклучува поедноставување на начинот на кој корисниците комуницираат со брендот „Дизни“, вклучувајќи го и обединувањето на многубројните мобилни апликации на компанијата во единствена платформа во рамките на Дизни+, каде што корисниците ќе можат да резервираат билети за парковите, да купуваат производи, да играат игри и да гледаат филмови, објави „Блумберг“.